Aruba menciona den schema di fraude di ex hefe di PDVSA durante caso na Merca

HOUSTON – Ex presidente di un di e unidadnan di PDVSA a keda acusa di labamento di placa, durante un caso na Houston, Texas e siman aki, unda cu nomber di Aruba y Corsou a cay. Ta trata di un investigacion Mericano riba un schema di 1000 miyon dollars. Ta trata di Javier Alvarado Ochoa, Venezolano, ex ehecutivo di e compania estatal petrolera, y dos otro persona. Otro nomber conoci cu a cay, ta Roberto Rincon, cu a soborna e tres personanan aki pa haya e dealnan lucrativo. E otro dos personanan ta Daisy Teresa Rafoi Bleuler y Paulo Jorge da Costa Casqueiro Murta. 

CORUPCION

E fiscalnan Mericano a bisa cu ‘e labadornan di placa profesional’ a traha hopi aña pa sconde e movimento di placa horta via soborno y fraude di PDVSA. Alvarado supuestamente tabata ricibi soborno di 

Roberto Enrique Rincón y Abraham José Shiera Bastidas, empresario Venezolano. E ultimonan aki tabata busca contracto nobo cu PDVSA, y tabata soborna 10% di e placa cu nan tabata ricibi di e trabounan anterior. E placa cu nan tabata gana, nan tabata laba via e cuentanan bancario na Suiza, Corsou y Dubai. Algo di e soborno tabata uza pa paga e hotelnan luhoso na Aruba, aunke no tabata menciona cua banco y cua hotel. Rincon y Shiera ya a admiti nan culpabilidad na 2018, pero sentencia di prison a keda posponi varios biaha caba. Ambos ta encarcela si na Merca.