Servicio Meteorologico di Aruba cu alerta pa calor excesivo

ORANJESTAD - Servicio Meteorologico di Aruba a emiti un alerta pa calor excesivo pa e proximo dianan. Esaki ta nifica un combinacion di temperatura halto (33 pa 36 grado celsius) y e porcentahenan generalmente halto di humedad (mas halto cu 70%) ademas di un biento zwak durante e proximo dianan cu lo pone cu e sensacion di calor lo por yega 38 pa 42 grado celsius.

VARIEDAD

E calor y humedad halto lo no baha mucho anochi cu temperatura bahando solamente te un minimo di 29 te 27°c grado. Esaki lo aumenta e peligro pa e hendenan cu no por haya un lugar adecua pa refresca nan curpa. 

TEMPORADA MAS CALOR 

Nos ta den e temporada di mas calor di aña : Calor excesivo ta e asesino di tempo nr. 1. Hende mester ta prepara pa e peliger cu calor excesivo ta ocasiona. Mucha chikito, hende grandi y hende cu malo di curason ta esnan mas exponi. E combinacion di temperatura y humedad halto lo combina, pa crea un situacion den cual malesa causa pa exposicion prolonga na temparatura halto, lo por presenta.  

ACCION DI PRECAUCION 

Limita actividad pafo di cas pa e oranan trempan di mainta of ora solo baha; ta recomenda pa entre di 11’or di mainta y 4’or di atardi limita e actividadnan pafo di cas of cu otro palabra den solo. Si bo tin un airco cu ta funciona, uz’e of a lo menos habri bentana pa laga aire pasa y circula. Bebe hopi likido, keda den camber cu airco. Keda aleha for di solo. Ora bo sali pafo bisti paña di color licht; no uza paña scur, ya cu esaki ta retene mas calor y ademas bebe hopi likido, preferiblemente  awa y juice sin sucu.