Motibo di manifestacion 'Comision Ta Basta' a bira discusion entre AVP y MEP

ORANJESTAD – For di diamars, partidonan AVP y MEP ta acusa otro di e motibo real di e manifestacion di diaranson atardi. Tur e tempo, e grupo cu ta yama nan mes ‘Comision Ta Basta’ for di siman pasa a emiti un comunicado pa splica nan meta di e manifestacion. E manifestacion mientrastanto ta parse uno mas di tur e otronan, pero cu metanan mas extendi. Fuera di entrega manifiesto na gobierno, lo atende cu Hulanda (via VNO) riba su responsabilidad y finalmente recorda e aniversario di fayecimento di fundador di e partido di oposicion MEP, Betico Croes efm. Entretanto lidernan di fraccion di tanto AVP y MEP ta cuestiona otro riba nan declaracionan haci referente e motibo 'real' pa tene un manifestacion diaranson atardi. 

Lider di fraccion di AVP Rene Baba Herde diamars a declara cu ‘ pa purba lanta hende pa e manifestacion di e partido MEP, MEP y su socionan ta parti e rumor cu gobierno di Aruba tin intencion pa kita e 'voorjaarspremie', 'najaarspremie', 'back-to-school-premie' y vakantieuitkering. Como reaccion lider di MEP ta bisa cu esaki no ta verdad. “Ami no tabata sa cu tabatin plan pa elimina vakantie uitkering ni nada di ambtenaar. Nos tabata discutiendo pensioen, y e consecuencianan pa pensionadonan y ambtenaarnan ora nan baha cu pensioen. Sr Baba Herde mester stop di ganja y prome cu acusa hende, e mester investiga su "facts"” Wever a responde na NoticiaCla.com diaranson mainta.

Tur esten, e comision mes, esta Comision Ta Basta, ta mustra cu ta ‘debi na continuacion di e mal maneho financiero di e gobierno actual y e hecho cu e gobernantenan ta sigui falta respet pa nos Gobernador integro sr. Fredis Refunjol, Comision Ta Basta ta organisa un manifestacion masal diaranson awor 26 di November’.

Den nomber di fraccion di AVP, Rene Herde a declara cu el a tuma contacto cu gobierno y por declara cu no tin niun intension pa kita niun di e primanan aki. Al contrario. E prima di fin di aña pa e pensionadonan di APFA ta wordo paga mescos cu empleadonan di gobierno. E prima di fin di aña di pensionadonan di SVB (= pensioen di behez/ aov) tambe ta wordo paga normal. Tur esaki a wordo confirma den e reunion publico cu a pasa via canal di television di Parlamento ayera nochi tambe. Awemainta esaki a wordo confirma un biaha mas. Rene Herde: "E gañamento chronico di MEP ta preuba di nan incapacidad pa papia berdad."

Mesora lider di fraccion di MEP Evelyn Wever Croes a reacciona” Mi no ta kere cu e gobierno aki lo durf di mishi cu e derechonan aki di trahador. Sr Herde mester stop di bruha tera y desvia atencion. E tin basta problema pa atende cun'e den su partido, den su fraccion y cu su gobierno pa e crea mas issues. MEP lo no permiti Mike Eman ni Baba Herde mishi cu ningun derecho mas di ciudadanonan, si nan no cuminsa corta gasto serca nan mes: laga Mike Eman y Baba Herde cuminsa manda dor minister cas prome cu nan pensa di mishi cu derecho di trahador”.

Di otro banda Herde ta mustra cu según AVP ‘pa lunanan largo caba MEP ta purba sembra preocupacion y discordia den comunidad. Nan no por haci esaki cu ningun argumento of prueba. Pesey nan tin cu recuri na gañamento. Net un dia despues cu parlamento a aproba e ley pa sigura e pensioen di tur trahado di gobierno y maestronan di scol, MEP ta purba sembra e preocupacion aki.

Riba e caso di tilda e partido heel di ta orchestrando e manifestacion di diaranson, Wever declara cu ‘MEP no tin niun manifestacion awe. Ta un grupo di mas di 10 mil ciudadano preocupa cu a hasi un accion di firma, tin un manifestacion awe. Ademas, laga Baba prueba unda MEP a bisa esey, pasobra esey tampoco ta berdad. Sr Herde a para bira un ser humano hopi patetico cu segun mi ni su famia ta kere mas. Sr Herde mester corda cu ta hende grandi e ta y no ta para netjes pa hende grandi hasi redashi sin base” Wever a finalisa bisando. Foto ta di archivo di un di e manifestacionan teni e aña aki.