Crisis Venezolano tabata unico referencia pa e islanan di Caribe Hulandes den ‘troonrede’

DEN HAAG – E crisis politico y humanitario na Venezuela y e efecto pa cu nos islanan ABC, tabata e unico mencion den e discurso anual di Rey Willem Alexander den nos direccion, durante e apertura Parlamentario Hulandes diamars mainta. “Hulanda lo mehora e forza di compra y infrastructura y lo fortifica e gobierno” tabata un otro declaracion, pero esaki ta parcialmente destina pa e islanan BES, y parcialmente tambe pa e otro islanan Hulandes Caribense. E ta un custumber di Hulanda cu den e discurso di Rey, (lesa: gobierno Hulandes) ta dedica apenas algun frase pa nos islanan. 

CRISIS HUMANITARIO 

“Debi na e crisis politico y humanitario na Venezuela, e parti Caribense di Reino (Hulandes), ta confronta cu menasa grandi di immigracion y su consecuencia economico”, Rey Alexander a sigui bisa den su discurso. “For di Hulanda, a pone ayudo practico y tecnico disponibel” Rey Willem Alexander a sigui bisa. Fuera di esey, a dedica e resto di e discurso na e situacion di Hulanda y Europa. Lesa e discurso completo AKI.