Lo aumenta castigo y boet pa taxi pirata

ORANJESTAD – Gobierno lo aumenta castigo y boet pa taxi pirata. Asina minister di husticia Andin Bikker a bisa dialuna mainta durante conferencia di prensa. Segun Bikker, asina  ta duna  atencion na e reclamonan cu ta bin for di comunidad riba e fenomeno cu nan ta yama taxi pirata. Taxi pirata ta personanan cu tin un vehiculo cu un A-nummer cu no tin vergunning conforme Landsverordening Personenvervoer pa transporta hende y basicamente ta comete un infraccion. Nan ta competi inhustamente cu esunnan cu si tin un vergunning y cu si ta paga belasting, paga number di auto etc. pa nan por gana nan pan. Ora cu a drenta gobernacion Minister Bikker conhuntamente cu colega Minister Romero a haya diferente preocupacion cu e taxista tabata expresa, y nan tabata señala e problematica aki. For di basta aña nan a trece esaki dilanti pa e gobierno anterior pero nan no tabata haya debido atencion. Durante conferencia di prensa dialuna mainta, Minister Bikker a bisa cu a sinta studia e situacion y a bin cu un Task Force pa yuda den e situacion. Los di esaki Minister Bikker a wak den e Verzamel Landverordening kico ta e castigo pa un persona cu ta transporta hende sin permiso. Loke Minister Bikker a constata ta, cu e castigonan aki ta hopi anticua y awor lo bay triplifica e castigo di detencion y redobla e boet. Actualmente e boet ta maximo 5 mil florin y awor ta bay pone na un maximo di 10 mil florin. Si bin recidivismo por ehempel unda ta constata cu un persona despues di a dune un boet, e ta keda risca y sigui transporta persona sin vergunning, e recidivismo lo wordo castiga severamente. Na Hulanda por ehempel e boet ta stipula na 10 mil Euro y cada biaha e ta keda na 10 mil Euro. Tambe e taxi pirata ta haya un boet di belasting pasobra nan ta opera sin cu nan ta paga belasting mirando cu nan no ta registra ningun caminda. Den e ley di Landsverordening personenvervoer articulo 35, lo bay introduci castigo severo pa des stimula e piratanan y asina proteha e taxistanan cu si tin nan permiso y tur papel na ordo. E taxista ta esun cu ta respeta e leynan y nan mester di gobierno su proteccion. Minister Bikker studiando e ley di Aruba ta bisa si un persona transporta sin permiso e acto ta wordo denomina como un infraccion. Na Hulanda esaki ta un strafbaar feit, e ta un misdrijf. Ta bay cambia e ley pa subraya e seriedad unda gobierno no ta tolera cu personanan c'un vehiculo cu un A nummer sin permiso ta competi inhustamente cu e taxistanan. Mientras tanto dialuna atardi tanto Minister Bikker como Minister Romero di Transporte a reuni cu e taxistanan pa tende mas di nan preocupacion y asina yega na un solucion riba e fenomeno di Taxi Pirata.