Varios compania di app di taxi kier drenta Aruba pa duna servicio

ORANJESTAD – Un cantidad di compania cu tin app di taxi internacional ta purbando di drenta Aruba. Minister di Transporte, Chris Romero, a confirma esaki dialuna durante un conferencia di prensa. Como tal a opta pa bin cu un propio app pa Aruba, pa e taxistanan uza localmente. Segun Romero, cu e introduccion di e app aki, ta frena y blokia entrada di e appnan, manera; Life, Uber y Easy Taxi pa drenta Aruba. E taxistanan no mester tin miedo pa cu e app aki, pasobra e ta solamente pa e taxistanan cu ta registra y tin un permiso.

SITUACION MUNDIAL

Segun Romero, Aruba mester keda realistico y no por tapa wowo pa realidad y aki ta trata tambe e parti di futuro di transporte na Aruba. Entre nan e cantidad di appnan cu tin pa cu transporte di taxi. A haci mencion di varios app internacional, cu ya caba ta purbando di drenta Aruba, pero cu gobierno ta bringando. Entre nan, pasobra mester tin permiso pa e drenta Aruba. Cu e app local, esaki ta bira un arma pa para e otronan. 

KEN POR UZA ESAKI

A sigura cu e app local, ta solamente pa e taxistanan cu tin un permiso legal y e ta opera pa Departamento di Transporte Publico. E ta funciona si mescos cu e appnan internacional, y ta haci e trabou mas facil pa tanto e usuario como e taxista. E taxistanan ta bira mas structura, y e servicio pa haya un taxi, ta bira ainda mas liher, segun Romero. Tambe, e ta un siguridad pa e turistanan y tur otro usuario, cu por conta cu e taxi ta safe y cu no ta un taxi pirata, pasobra eseynan no tin acceso na un app asina. Romero ta consciente cu no lo por bay elimina tur taxi pirata, pero si un gran parti. No ta conoci ainda ken lo traha e app, ni e parti logistico, pasobra esaki ta den preparacion ainda. Gobierno ta hayando varios presentacion di esunnan cu ta diseña app, pa asina dicidi riba esaki.