Wever: Varios problema presenta pa e maestronan ta atendi caba

ORANJESTAD – Varios problema presenta pa e maestronan ta atendi caba. Asina prome minister Evelyn Wever Croes a bisa NoticiaCla.com dialuna mainta, reaccionando riba e ultimo manifestacion di e maestronan di diabierna ultimo. Wever Croes, a haya e puntonan di e manifiesto di e maestronan ‘zakelijk y bon’. “Mi ta aprecia esey” Wever a bisa Noticiacla.com dialuna. E no ta di acuerdo sinembargo cu e pensamento cu ‘e mester a actua dos biaha caba’, na lugar di colega Minister Rudy Lampe, pasobra e maestronan no kier a ‘deal cu ne’. A haci e pregunta debi cu e grupo cu a presenta diabierna, no kier a tende di Lampe y a pidi specificamente pa Wever. Den e ultimo manifestacion cu Simar y Seppa, tambe Wever a cay aden y a atende cu e maestronan. 

DERECHO

Segun Wever, e maestronan a bin trece nan preocupacionnan na gobierno y esey ta nan derecho. “Ami no a mira politica akiden. Mi ta aprecia e forma, con nan ta lucha pa enseñansa y mi ta contento cu nan tin e oportunidad pa trece nan preocupacionnan sin cu nan ta menasa cu riot comando” Wever a bisa. Pa loke ta e contenido,  Wever a segura Noticiacla.com cu e ta tuma nan (maestronan) preocupacionnan hopi na serio. “ Como mama mi por bisa bo, cu mi tin un respet grandi pa tur maestro cu ta yuda nos educa nos yiunan. Kico cu mi por haci pa yuda den enseñansa, mi lo hacie”.

SITUACION FINANCIERO

Segun Wever, tin un realidad si, y esey ta e realidad financiero cu nos mester tene cuenta cu ne. “Lamentablemente no tin un “easy way out” di e herencia financiero di gobierno anterior. E bon noticia ta, cu tin un “way out” si y nos ta trahando riba esaki” Wever a sigui bisa.  “A pesar di e situacion financiero nos ta invirtiendo 5.7% di nos GDP na enseñansa. 17% di presupuesto di pais Aruba ta bay na enseñansa. Y nos meta ta pa - una bes nos sali di e crisis financiero - inverti mas den enseñansa, den e maestronan y den innovacion den enseñansa”. 

E PUNTONAN ATENDI CABA

Mes momento e mandatario a bisa cu tin varios di e puntonan cu ya a atende caba. Pero tin algo den e comunicacion. “Mi no sa si nan ta e mesun grupo cu a bin dia 2 of 3 juli, mi no tabata na Aruba, pero di e carta ey tambe mayoria di tema ta atendi caba. E problema ta parce mi cu tin diferente grupo riba e tereno aki cu ta activo y ta entrega carta. Segun Wever, el a ricibi carta di SPO cu a atende y soluciona. Nan ta informa. “ Mi a ricibi carta di Trai Merdia cu a atende y ta casi full soluciona y esunnan concerni ta informa. Mi a ricibi carta di MDC y nos a tuma e decisionnan necesario, y awor ta den proceso di ehecuta. Esunnan concerni ta informa caba” Wever a sigui bisa. “ Pues nos ta trahando, pa atende cu e preocupacionnan den enseñansa y lo duna e maestronan e atencion debido”, e prome mandatario a bisa finalmente. NOTA: Potret ta di archivo di Noticiacla.com di e manifestacion di maestronan di diabierna ultimo.