Romero: Lo contesta compania di telecom na tempo pa evita multa

ORANJESTAD – Gobierno lo contesta e compania di telecomunicacion Digicel, prome cu comienso di november proximo, sea positivo of negativo riba nan preguntanan haci pa cu cierto proyecto pendiente, evitando pago di multa. Asina Minister di Telecomunicacion, Chris Romero, a bisa durante un conferencia di prensa dialuna mainta. Siman pasa e director general di e compania Digicel  Lincoln (Dello) Gomez a presenta un sentencia di corte, (y prome cu esey NoticiaCla.com a raporta esaki caba), cu ta obliga gobierno duna contesta den 3 luna di tempo, sino por multa gobierno.   

PROBLEMA HEREDA 

E mandatario tabata breve riba e tema dialuna, y a bisa cu e ta un caso cu el a hereda, pero cu e lo contesta debidamente. El a tarda, segun Romero, pasobra mester a consulta cu expertonan riba e tereno ey y crea un maneho responsabel riba e tereno aki ya cu no tabatin uno anteriormente. Esaki ta trata e asunto di e.o. cabelnan subteraneo (weefsels) cu kier usa pa por tin mihor telecomunicacion. E caso ta uno di añanan largo cu e compania menciona tin den corte, pasobra e ministernan di pasado y actual, sea a opta pa no contesta, of no tabata suficiente diligente pa contesta e preguntanan. E compania en cuestion a pidi e mandatario pa cierto permiso, pa por a expande nan servicionan di telecomunicacion. Pero tanto den pasado como awor, e gobernantenan responsabel, no a contesta. Den pasado recien a hiba gobierno corte, y ni asina gobierno no a contesta e pregunta. E biaha aki gobierno a bolbe perde e caso, pero awor cu un multa mara na dje. Aworaki, gobierno a confirma cu nan lo contesta e preguntanan haci, dentro di e tres lunanan cu huez a pone pa contesta, y cu ta vence comienso di november.