Ley privatizacion ANSA NV, Tiara Air y TPEF 2014 aproba unanimamente

ORANJESTAD – E ley di privatizacion di ANSA NV, Tiara Air NV y presupuesto TPEF 2014 a keda aproba unanimamente diamars atardi den parlamento. Como no tabatin hoofdelijke stemmen, no tabatin voto. Ademas ni fraccion di MEP ni Democracia Real tabata den sala ora di voto pues, e la keda acepta unanimamente. Segun e mandatario cu ta representa e tres leynan den su comentario na NoticiaCla.com, esta Otmar Oduber, e la mustra cu e reunion ‘tabata uno bon, di nivel halto di tur dos banda, y directo y al punto henter dia. E preguntanan tabata al cao riba tur tres ley” e mandatario a finalisa bisando.

Oduber a splica con cu e aprobacion pa loke ta Tiara Air NV, ta rectifica loke ta un proceso cu a inicia un aña pasa na momento cu Gobierno a interveni ora cu Tiara Air NV a encontra su mes cu bastante dificultad dor di problematica cu tabatin na Venezuela pa cu e pagonan di dollar e tempo ey y Gobierno a duna sosten cu un miyon dollar. Pues esaki a keda ractifica den ley diamars den Parlamento.

Un otro ley cu a wordo aproba pa Parlamento di Aruba ta e ley di ANSA NV cu ta trata e privatizacion di ‘air traffic controle’ di e Departamento di Aviacion Civil, caminda ICAO ta pidi pa tin e separacion pa loke ta e ‘uitvoering di e toezicht’ cu mester tin riba e trabounan di ‘air traffic controle’, unda a scohe pa hinca esaki den un structura pa un NV separa for di Gobierno, caminda lo haya cu tur e trabounan cu tin di haber cu ‘lucht beveiliging’ ta bay cay bou di dje, e mandatario ta bisa. E ley aki a keda fuertemente critica pa entre otro Raad van Advies, cu de hecho a critica no menos cu 24 punto y no a considera e ley aki apto pa pasa manera cu e mester a pasa. Na su turno, gobierno a sigura pa medio di su minister Oduber, cu a adapta e ley y hiba tur e consehonan pa e ley aki keda aproba. Sinembargo tin instancia cu ta para ariba cu esaki no necesariamente ta e caso. 

Pa loke ta e fondo conoci como e Tourism Product Enhancement Funds (TPEF), cu ta fondonan pa mehoracion di e producto turistico na Aruba, esakia haya bida na momento cu a lanta Oficina di Turismo (ATA) como un NV y a logra convence e asociacion di hotelnan timeshare na Aruba pa contribui cu esaki. A pone un porcentahe disponibel pa crea un fondo cu ta bay aloga pa e mehoracion di e producto. Sinembargo riba e ley aki tambe tabatin keho di parti di Raad van Advies, unda cu segun e organo consultativo, no tabatin splicacion suficiente riba kico exactamente lo a usa e fondo, y e informacion cu lo a duna, no tabata completo. Critica den direccion di e fondo ta entre otro cu ta usa esaki tambe pa servicionan di Serlimar, siendo cu e compania aki mes lo mester cuminsa genera extra fondo comienso di aña siguiente.