Hulanda campeon Europeo den baseball cu victoria 5-1 riba Italia

BONN/ WILLEMSTAD - Cu un Ademar Rifaela “na candela” cu bate den man, Hulanda pa di 23 biaha a conkista e titulo di Campeonato Europeo di baseball. Den fin di siman ultimo na Bonn, Alemania, Hulanda a gana 5-1 di Italia cu t’e na momento ey tabata invicto. E di bintitres titulo pa Hulanda tabata danki na ‘grand slam’ di Kalian Sams y mas despues un solo homerun di John Polonius, kende den e evento Europeo a haci su debut cu e seleccion Hulandes.

E victoria den e Campeonato Europeo sin duda ta un motivacion grandi pa e ekipo Hulandes cu ayera mes a coy direccion pa Italia, caminda for di diaranson awor te cu diadomingo lo hunga na Parma y Bologna un torneo pa clasificacion olimpico. 

Torneo grandi pa Ademar Rifaela

E leftfielder yiu di Corsou, Ademar Rifaela (24 aña), a conta cu un debut sensacional den e seleccion di Hulanda.

Ademar, kende a finalisa temporada na Merca cu Norfolk Tides (AAA) di e organisacion Baltimore Orioles, a keda premia como MVP di Campeonato Europeo.

El a finalisa e torneo como lider careda empuhado (17) y tambe como campeon honronero (6). Mas aleu el a score mayor cantidad di careda (10) y for di man di presidente dje Federacion Europeo a ricibi e premio como MVP dje campeonato.

E picher, Orlando Yrtema, tambe a keda premia como e miho picher dje campeonato. 

Cortesia Extra.