DIP: Kiosko na Eagle Beach ta traha ilegal y sin ‘bouw vergunning’

ORANJESTAD – Un accion recientemente di DIP y DOW a causa basta conmocion den comunidad. Ta trata di e accion di kita un kiosko na Eagle Beach, cu lo ta traha ilegal y sin permiso di construccion. Basa riba esaki Directie Infrastructuur en Planning (DIP) a splica e siman aki riba e caso, indicando cu nan ta hibando un maneho conhunto cu DOW pa loke ta “toezicht y handhaving”. Manera ta conoci, DIP ta un instancia cu tin gran cantidad di ley cu ta cay bou di dje, manera entre otro: e ley di LRO cu ta mara ROP y ROPV, e contractnan firma cu diferente hende cu tin cu paga segun contract y ley di Landsverordening Uitgifte Eigendom (LUE). Tur esakinan ta e leynan, cu ta mara na diferente condicion.

DIRECTOR DI DIP HAIME CROES TA SPLICA LO SIGUIENTE: 

Segun e director di DIP, ora cu ta trata di un kiosko, hopi biaha DIP ta mara na un contract y a base di esaki mester ricibi cierto suma cu ta drenta DIP. Lamentablemente durante e ultimo añanan esakinan no a wordo cobra, cual ta pone e departamento den un problema basta serio y pues mester cuminsa cu ‘handhaving y toezicht’. Pa mas cu dos luna caba, tur hende cu no ta paga pa nan kiosko entre otro, a haya notificacion di e pago cu mester tuma luga y tambe di e atraso cu nan tin cual mester paga. Adicionalmente ta wak si enberdad ta uza/huur e kioskonan door di e persona cu a huur e, y cu no tin ‘onderverhuurder’. Segun sr. Croes, a base di esaki a haya varios caso di hende cu no a paga, hende cu a ‘onderverhuur’ y e hendenan cu ta haci cambio riba kiosko, e cambionan cu no mag.

Den e caso di e kiosko na Eagle, a duna nan 3 carta participando na nan cu nan no mag di haci locual nan tabata haci riba e tereno y mester kita esaki. Lamentablemente na dado momento a tuma nota, cu nan no ta cumpli cu locual cu DIP ta pidi, pa cual sr. Croes a splica cu ta pa e motibo a tuma e medida drastico. Den e contract ta poni cu ta DIP ta ‘beheer’ tur e kioskonan y tambe tin indica, kico e persona cu ta huur esaki mester haci si ta desea cierto cambio, esta, cu nan mester acudi bek na DIP. 

Sr. Croes a splica cu loke ta importante den tur esaki ta, cu mester tin permiso y cumpli cu e condicionnan di e contract. Locual a constata na e kiosko en cuestion ta, cu a haci e cambionan na esaki y a cera un parti. Cual ta pone cu indirectamente e kiosko a bira mas grandi, cual no ta cuadra mas cu e contract cu a firma. A bisa e doñonan cu e expansion cu nan a haci y e forma cu nan a cer’e ta bay en contra di e contract cu a firma cual no por. Manera menciona, a manda e persona tres carta cual nan no a reacciona riba dje. Banda di esaki e contract ta stipula tambe cu mester cumpli cu pago, cual tampoco a cumpli cu ne. Pa loke ta peticion pa cambio cu e personanan a haci, sr. Croes a splica cu nan mester warda pa un contesta, cual no tabata e caso. Prome cu DIP a yega na atende cu e caso, ya a haci e ahustacionnan. 

Finalmente sr. Croes ta pidi cada persona cu tin contract, pa cumpli cu esaki y no haci cambio cu no ta permiti.  Den caso cu toch tin necesidad pa esaki, ta enfatisa cu mester acudi na DIP, pa mira si por ricibi permiso pa hacie.