Venezolanonan mal contento cu trato haya di e aerolinea Albatros

ORANJESTAD -Diabierna atardi, 11 persona mester keda deporta for di Aruba cu e aerolinea Albatros. Mientras tabatin otro pasahero riba mesun vuelo cu mester a bay Las Piedras. Banda di 4'or di atardi ta drenta informacion cu e avion cu mester a hiba e pasaheronan a daña pero lo mira con por yega na un solucion. For di momento cu a bira conoci cu e avion a daña cada ora tabata bisa e pasaheronan cu e vuelo ta sali pa Punto Fijo, un retraso cu a dura te cu 1'or di marduga pa despues e vuelo keda cancela. E disgusto a bin, momento cu a nenga nan awa y cuminda pasobra ta trata di un vuelo special y cu e pasaheronan mester ta gradicido cu tin un vuelo special cu ta sali pa Venezuela. Hopi di e pasaheronan aki mester a paga como 100 dollar si e maleta pasa mas cu 2 kilo y mayoria di e pasaheronan a bin cu tres maleta y cada maleta extra nan mester a paga. E otro pasaheronan a cuminsa altera pa motibo di oranan largo di retraso, nan no por a haya ni awa y cuminda y ta haya informacion cu nan no por biaha mas pa Punto Fijo pasobra aeropuerto ta cera pero si nan por bay Caracas y di eynan nan mester busca e manera pa yega Punto Fijo. E pasaheronan a cuminsa grita cu esey no ta husto si a paga 360 florin pa vuelo mas e cobransa di 100 dollar pa maleta, a haci cu nan a altera mas.  Funcionarionan di aeropuerto a pone Cuerpo Policial na altura di e situacion momento cu a sinti cu algun pasahero a cuminsa bira fastioso te cuminsa bringa. Pa loke ta e personanan cu mester a deporta, tambe a bira furioso pasobra nan mester a bay bek pa e cel na GNC. Polis cu man duro mester a pone orden pa e situacion calma. Debi cu Albatros no tin un otro avion a cancela e vuelo.