Kamilah Dammers a logra medaya di Oro pa Aruba den Weganan CAC

ORANJESTAD - Kamilah Dammers a logra medaya di Oro pa Aruba den Weganan CAC diamars. E noticia aki ta corona esun anterior di su prome wega perfecto di bowling. Tabata 21 aña pasa pa ser exacto 22 di november 1993 cu Aruba a logra su prome medaya di Oro, e tempo aya conkista pa e bolichera Edna Maduro den e Weganan CAC na Ponce, Puerto Rico. Diamars 25 di november 2014, e historia ta ripiti y e gran momento a presenta un bes mas pa e deporte di boliche y Aruba completo, ora cu e atleta femenino, Kamilah Dammers a logra e medaya di Oro pa nos dushi isla den e Weganan Centro Americano y del Caribe na Veracruz, Mexico. Pa mas di binti y un aña e delegacion di Aruba a warda riba e gran momento aki.

Algun ora prome, e noticia a bin for di Veracruza tambe ora cu a bira conoci cu Dammers a hunga su  prome perfect game bowling den historia den Weganan Centro Americano y del Caribe. Tabata diamars mainta ora cu e bolichera Arubano Kamilah Dammers a tira e perfect game, 300 pins den e Bolerama na Veracruz, Mexico. Manera nos a wordo informa cu nunca antes den historia di e Weganan Centro Americano y del Caribe un hungador di boliche femenino a tira un perfect game. Kamilah Dammers ta e prome hungado cu a realisa e hazanja aki. Es mas e record den historia di e Weganan CAC den boliche femenino ta 1367 pins den 6 wega mientras Kamilah a tira 1516 pins den 6 wega.

Den e wega number cinco, Dammers di Aruba ta logra un hazaña door di tira 13 strike tras di otro pa un perfect game. Mester bisa cu tur e delegacionnan participante a stop di hunga y bin felicita e bolichera Arubano. Na final Kamilah a tira 1516 pins ta un record Centro Americano y del Caribe. Mas cu claro e alegria tabata super grandi cerca Kamilah, entrenador James y e delegacion grandi di Aruba cu a lanta y grita di emocion.