Maestronan diabierna a nenga di atende cu minister Lampe

ORANJESTAD – Un grupo di maestro disgusta diabierna a rechasa minister di Enseñansa Rudy Lampe pa topa cu ne y a exigi pa papia cu Prome minister Evelyn Wever Croes diabierna durante e protesta anuncia. Cu lemanan manera ‘Lampe, afo!’, e maestronan a mustra nan disgusto pa cu e mandario. Ora cu e mandatario di enseñansa a sali pafo, e maestronan a reacciona cu un grito di desaprobacion, esta a ‘boe’ e mandatario. E ora prome minister Wever a duna cara y a ricibi e manifiesto presenta pa representante di e maestronan. Nan a pidi pa atende e lista largo di problema den enseñansa, cual lista ta creciendo, y a repasa tur e puntonan un pa un. Na final, a te hasta pidi pa baha Lampe como minister. Minister Wever a priminti di tene cuenta cu tur e puntonan y a mustra cu lo atende cu e situacion y bolbe cu nan pronto. Mientrastanto nan a dirigi nan mes pa Parlamento unda cu a topa cu presidente di Parlamento Ady Thijsen, y a pidie mesun cos, y a bay mas leu, pidiendo pa p.e. entrega un mocion di desconfiansa contra e mandatario di Enseñansa. Ora cu NoticiaCla.com a puntra e presidente di sindicato di maestro Simar, Josephine Albertus, pakico no kier a topa cu Lampe, el a contesta cu e maestronan a topa cu ne dia 3 di juli, pero e no a haci nada cu e manifiesto, pues nan no tin nada di papia mas cu ne. Pa loke ta Parlamento, Thijsen a pidi e grupo 2 siman di tempo, pa bolbe cu un contesta, riba cual e representante a bisa cu e por wanta solamente 1 siman. A mustra riba nan responsabilidad pa cu muchanan y pa cual a opta pa protesta den nan ora liber y no durante ora di trabou. Pero cu si no tin resultado, lo mester haci esaki durante ora di trabou.