Atracado na Corsou ta core bay laga su baby den auto

WILLEMSTAD.- Ayera un caso insolito a tuma luga, ora cu un atracado a bay tira atraco hunto cu su amigo y un yiu baby den auto. Pa colmo ora el a keda gara pa polis, el a baha for di auto core bay laga su yiu den auto.

T’asina cu diahuebs 12 di september 2019 alrededor di 16.28 or, Central di Polis a ricibi notificacion di un caso di atraco cu tabata tumando luga den un toko riba Cubaweg. Dos homber tur na preto bisti cu arma di candela a drenta e establecimento y bou di menasa a bay cu placa cash. Despues di nan acto, nan a drenta un vehiculo y bay for di e sitio.

Alrededor di 16.33 or otro notificacion ta drenta na Central di Polis, cubna un toko riba Sto. Domingoweg un atraco tabata tumando luga. Descripcion di e sospechosonan ta cuadra cu esun di e dos hombernan, cu un rato prome a atraca un toko riba Cubaweg. E unidadnan policial a cuminsa cu un buskeda den e area di Buena Vista y a señala un homber tur soda, banda di un vehiculo den Carriacouweg y un otro homber cu na momento cu a mira e unidad a cuminsa core. Polis a los tiro di advertencia, pero e sospechoso aki a sigui core. Na e sitio den Carriacouweg polis a detene e homber sospechoso L.B.A.E. naci na Corsou di 26 aña di edad y a confisca e vehiculo. Continuando cu e investigacion despues di un persecusion polis a detene e otro sospechoso, cu a core bay den area di Heintje Kool. Ta trata di e homber R.M. naci na Corsou di 23 aña di edad.

Den Biminisweg polis a localisa e vehiculo cu probablemente e sospechosonan a uza, pa comete e atraconan ariba menciona. Den e vehiculo polis a haya y confisca caha di placa y algun paña. Tambe polis a confisca e vehiculo pa mas investigacion. A presenta e sospechosonan dilanti un fiscal auxiliar, cu despues di interogacion a ordena nan encarcalemento pendiente di mas investigacion.

Polis no ta haci mencion dje hecho cu den un dje autonan a topa e baby. Pero nos tin informacion cu e atracado a baha bay laga su baby den auto na Heintje Kool.

Cortesia Extra