Accionan di awe lo clausura un siman turbulento pa sector laboral

ORANJESTAD – Despues cu douane, polis y Serlimar a tene nan accion mas tempran e siman aki, ta ‘toca turno’ na un grupo di maestro y trahadonan di MetaCorp cu lo protesta diabierna merdia na Bestuurskantoor.  Dos grupo cu ta tene nan accion riba nan mes, esta separa di otro, pero cu tin si, e  mesun meta, esta di defende nan derecho y bringa pa nan existencia. E grupo di maestronan ta malcontento cu maneho di minister di Enseñansa Rudy Lampe, y e trahadonan di MetaCorp, ta malcontento cu e maneho di minister Otmar Oduber, cu segun e trahadonan, ta perhudicando existencia di por lo menos 3 di e companianan cu ta cay bou di MetaCorp door di pasa un ley pa Serlimar aki 10 dia. 

ACCION

Pa loke ta maestronan, nan ta sinti cu e mandatario responsabel pa e departamento aki, no ta tuma nan consideracionan y no ta envolvi nan den decisionan crucial cu mester tuma. No ta conoci si ta trata di tur maestro, pero ta conoci cu sindicato SEPPA y Simar a uni forza pa e meta aki. Nan accion ta cuminsa 2:30 ora cu nan forma na Wilhelmina Park y marcha pa Parlamento y posiblemente Bestuurskantoor. Pa loke ta e grupo di trahadonan di MetaCorp, a compronde cu nan lo acudi pa 3’or dilanti Bestuurskantoor, y probablemente lo bin cu tur truck di entre otro EcoTech y otro companianan manera Atco, pa mustra nan forza y impacto. 

SIMAN PISA

Cu e accionnan di awe, e ta cera un siman turbulento, unda cu tin hopi malcontento den comunidad, dirigi contra e gobernantenan actual. Douane ta mustra cu nan tin derecho pa welga, y a paralisa nan operacion, creando tension y rabia den comercio. Polisnan tambe (e parti di recherché Oranjestad) tabata malcontento cu nan espacio di trabou, y a protesta pa cu esaki. Despues, tabata diahuebs cu e trahadonan di Serlimar a opta pa pone trabou abou, pa pone presion riba e minister responsabel pa e departamento aki, esta Otmar Oduber di medio ambiente, pa sigura nan futuro. Hopi ta conisdera e accion aki un accion orchestra pa e propio mandatario,   aunke cu ora cu Noticiacla.com a acerca e mandatario pa su reaccion, e la informa e portal aki cu e no tabata na altura mes di e accion aki. Pa loke ta esun di MetaCorp awe, e doñonan a bisa di ta sostene e accion, pero cu ta un decision di e trahadonan mes pa tene accion.