Xander Bogaerts a logra otro hazaña historico den baseball Mericano

TORONTO – Durante e wega di baseball profesional Mericano, e pelotero profesional di Aruba, Xander Bogaerts, a logra otro hazaña importante pa su carera. Tabata durante e wega di diahuebs contra Toronto Blue Jays, cu el a bati su di 50 doblete di temporada. Boston a gana e wega cu score di 7-4. Loke ta haci e hazaña importante ta, cu ta Bogearts ta bira e di dos hungador di Boston den su historia, cu tin por lo menos 30 homerun y 50 doblete den un aña. Ta solamente David Ortiz a logra esaki na 2007.  E Arubiano ta drenta den historia di Major League Baseball, e di dos short shop cu ta logra esaki despues di Alex Rodriguez, cu a logra esaki na 1996. Mas prome e siman aki, Bogaerts a logra dal su di 1000 hit. Banda di Bogaerts, su colega di partido Rafael Devers ta su tras cu 29 homerun y 50 doblete. “Nos ta hopi orguyso di dje” manager Alex Cora a bisa di Bogaerts. “No ta solamente e cifranan, sino tambe loke e ta nifica pa e club, e lider cu e ta demostra di ta. Den un temporada malo, e t’ey tur dia”. 

SERIE MUNDIAL

?Boston Red Sox sinembargo, ‘oficialmente’ ta elimina di e contienda pa serie mundial e aña aki. Cu apenas 15 wega prome cu e temporada termina, e ekipo ta na di 3 luna, 10 wega tras di number dos Tampa Bay. E ganador di cada division ta bay playoff mesora, mientras cu e di dos lugar ta hunga pa e asina yama ‘wild card’. No ta conoci si Boston por logra esaki ainda. Di tur forma, mientras cu Boston ta sufriendo e temporada aki, Bogaerts si ta trahando un nomber pa su mes. E aña aki e ta gana 12 miyon dollar, mientras cu otro aña, su contract grandi di 120 miyon dollar ta cuminsa core.