Hugo Carvajal ta bringando su extradicion pa Merca for di Spaña

MADRID (AP) — Ex militar y considera como spion Venezolano, Hugo Carvajal, ta bringando su extradicion di Spaña pa Merca. El a bisa den corte diahuebs cu e lo no permiti extradicion, pasobra e cargonan di traficacion di droga y otro cargo contra dje, ta politicamente motiva. Segun su abogado, Merca kier Carvajal, pasobra ‘e tin informacion cu por benta gobierno actual di Venezuela abou’. Segun e abogado, tin pensa cu Carvajal pa casi un decada, a controla e secretonan di e armada Venezolano. Y e informacion aki por ta crucial pa Merca. Merca no a gusta cu na 2014, Hulanda a laga Carvajal bay for di Aruba, despues cu autoridad di Aruba riba peticion di Merca mes, a detene Carvajal e tempo ey. Hulanda a prefera di mand’e bek pa Venezuela, enbes di extradit’e pa Merca. E fiscalnan Mericano ta bisa cu Carvajal mester bay Corte pa ‘narcoterorismo’. E lo a yuda coordina 5.6 tonelada di cocaina di Venezuela pa Mexico na 2006. E lo a supuestamente uza arma tambe, pa logra su meta y lo a asisti y protega guerilla Colombiano. 

Na 2002, Caravajal a subi den rango militar na Venezuela, y a bira un di e aliadonan di mas cerca di e presidente di e tempo ey, Hugo Chavez. Despues di algun luna cu Maduro a tuma mando, a bah’e di rango. Ora cu mas tempran e aña aki Carvajal a sostene oposicion contra Maduro, el a huy pa Madrid, unda cu e oficialnan di inteligencia Spaño a yam’e bon bini. Pero polis a detene despues na april riba peticion di Merca.