Aruba a reclama Venezuela p’e expresionnan haci di parlamentario Careño

ORANJESTAD – Gobierno di Aruba a reclama Venezuela p’e expresionnan haci di nan parlamentario Careño. Asina Prome Minister di Aruba, Evelyn Wever Croes, a revela durante un conferencia di prensa diahuebs mainta. Segun e mandatario, gobierno di Aruba den e siman aki a tuma nota di e expresion- y menasanan di un parlamentario di Venezuela. Wever-Croes a expresa cu e expresionnan aki di sr. Careño mester considera cu hopi seriedad y pa e motibo aki, Gobierno di Aruba a tuma accion inmediatamente. 

BANDERA NA ARUBA

E expresionnan haci pa Sr. Careño primeramente ta, cu Venezuela lo bin pone su bandera na Aruba, pa yuda salba e pais di e gara colonial Hulandes y libera Aruba di Hulanda. Despues el a menciona cu lo uza Aruba y Corsou pa ehercicio militar Mericano y por ultimo cu Venezuela tin tur su misilnan dirigi riba tur avion, cu lanta di Aruba rumbo pa Merca.

ACCION DIPLOMATICO

“Mirando e seriedad di e expresionnan aki, Gobierno di Aruba mesora a tuma accion y a manda un nota diplomatico pa e autoridadnan Venezolano den cual ta expresa e disgusto, pa cu esaki y ta exigi aclaracion di Gobierno di Venezuela riba e expresion- y menasanan di sr. Careño”, Prome Minister a duna di conoce.

FALSO

Prome Minister a confirma cu e expresionnan aki ta falso y cu Gobierno di Aruba no ta acepta e expresionnan aki. Aruba ta un pais autonomo y cu 33 aña di Status Aparte no mester pa ningun pais bin yuda libera nos di nada. Siguientemente, a confirma tambe cu aki na Aruba no tin ningun ehercicio militar Mericano ta sali. “Esaki no ta permisibel y no tin niun acuerdo riba esaki. E acuerdo cu tin ta, cu nos pais no ta uza pa nada militar pa cu e conflicto entre Venezuela y Merca. E menasa pa cu atake riba e avionnan cu ta lanta for di Aruba pa Merca, ta uno hopi serio y ta poni riba nivel mas halto”. 

HULANDA

Gobierno di Aruba a tuma contacto cu Departamento di Minister di Relacion Exterior na Hulanda, mirando cu e situacion aki ta uno cu mester atende riba nivel di Reino. Representante di Hulanda na Den Haag a wordo “ontboden” cual ta nifica, cu e mester a bin di inmediato pa duna cuenta y a declara cu nan ta distancia nan mes di tur e expresionnan haci door di sr. Careño. 

EXIGI ACLARACION

Aruba a para riba, cu ta exigi aclaracion tambe na un nivel mas halto, cu ta cerca e Minister encarga cu Relacionnan Exterior di Venezuela. Esaki tambe ta confirma di ta distancia su mes for di e expresionnan haci. 

SITUACION VENEZUELA

“Gabinete Wever-Croes ta enfatisa cu e situacion di Venezuela ta causa un efecto hopi grandi riba nos pais. Nos responsabilidad ta cu nos pueblo. E prioridad di Gobierno ta bienestar di pais Aruba. E tipo di expresionnan aki, nos lo no acepta bou ningun manera. Gobierno ta trata den tur circumstancia pa yuda mas tanto posibel, sinembargo di nan banda, Venezuela tambe mester tene cuenta cu e expresion- y menasanan cu nan ta haci. Esaki sigur ta un motibo, pa kico Aruba mester mantene e frontera cu Venezuela cera”, Prome Minister a duna di conoce.