Randal Corsen y Tony Succar den Casibari Jazz Festival otro siman

Posted on 09/13/2019 10:35 am AST | Updated on 09/13/2019 10:36 am AST

ORANJESTAD – Dos nomber grandi lo ta den e prome edicion di Casibari Jazz Festival otro siman na Casibari Music Café & Grill, dia 20 y 21 di september proximo, esta Tony Succar y Randal Corsen respectivamente. Esey a keda participa diahuebs atardi durante un conferencia di prensa. E version original di e festival, Caribbean Sea Jazz Festival a keda cancela, debi cu a perde e sponsor principal (Aruba Tourism Authority), pa cual a dicidi di crea un version mucho mas chikito, pero si cu suficiente ingrediente impactante, incluyendo e lugar. 

E FESTIVAL

E organizadornan a logra confirma varios artista di caliber, fuera di dos grandi menciona, cu ta Ará Caribbean Jazz Sextet, Oruba cu Reno Steba y Robert JeanD’or, cu lo acompaña e instrumentalista y compositor Tony Succar. Tania Kross lo ta hunto cu Randal Corsen di Corsou y Dibo D. Ademas tin Count Tutu cu Michael Bremo (USA) y Antonio Bello for di Spaña. 

LOCALIDAD

E organizadornan ta cambia e localidad di Renaissance Festival Arena pa e localidad iconico na Casibari Rock Formations, esta Casibari Music Café & Grill. Cu e backdrop di baranca bunita, e ta bira un festival cu musica reinventa, unda cu Jazz, Blues, y musica Latino lo yena e anochi cu e ritmonan pasiona. 

MAS COS

Pa añadi na e festival, lo tin e ‘food court’, yena cu tur aspecto di cuminda, y tambe mercado di artesania. Fuera di e festival y su aspectonan na e sitio, CFF lo bay riba un tour di scol, pa asina alimenta y cultiva e aprecio musical cerca nos hobennan. Aunke cu a perde sponsor grandi manera ATA, e festival su organisadornan a logra di mantene e otronan si manera: Unoca, Aruba Airport Authorities, Divi Resorts, Balashi, De Palm Tours, Super Food, Setar, CMB, Renaissance, High Performance, Hertz, Interprint, AFAS, Cas di Cultura, ADCTRA, Aruba Port Authorities, Divi Tamarijn Aruba all-inclusive y Puro fairtrade coffee. Carchi di entrada ta na Casibari Music Café & Grill.

  • Powered by SETAR