Ex Aqua Condominiums awor ta bira Radisson Blu Hotel

ORANJESTAD – Radisson Blu Hotel lo inverti 80 miyon dollar pa completa e proyecto hotelero di ex Aqua Condominiums. Diaranson atardi Minister di Turismo, Dangui Oduber tabata presente na e edificio di ex Aqua Condominiums, caminda e mandatario a haya un presentacion di e proyecto di Radisson Blu. Despues e mandatario a firma un carta di compromiso den nomber di Gobierno conhunto cu Beachside Development Company y Radisson Hotels International.

E proyecto hotelero aki a cuminsa na aña 2007 y a encontra hopi dificultad na caminda y a keda para pa hopi aña. Segun e mandatario, danki na confiansa den e gobierno actual, Sr. Venancio Gonzalez, a cumpra e propiedad aki. Despues di esaki na aña 2018 e inversionista a acerca Radisson Hotels International, cu e idea pa desaroya y converti e proyecto aki den un Radisson Blu Hotel.

Radisson Blu Hotel ta un proyecto grandi, cu un inversion di mas o menos 80 miyon dollar, cual lo tin un impacto sumamente positivo pa Aruba su economia. E desaroyador a haci un compromiso cu Gobierno, cu ora e proyecto finalisa nan lo emplea mastanto e yiunan di tera den nan servicio. E hotel lo bay contene 208 camber hopi luhoso, pa atrae e turistanan cu tin un “spending capacity” hopi halto. Radisson ta premira cu pa por duna un servicio di calidad halto, e hotel lo mester 190 empleado den servicio.