Minister ta aprecia tur critica di docente cu tin contra dje

ORANJESTAD – Diabierna tin un accion plania di e docentenan. Por lo menos asina Prome Minister, Evelyn Wever, a bisa diahuebs durante conferencia di prensa. Esaki no ta straño ya cu e siman aki e criticanan a aumenta grandemente contra maneho di Minister di Enseñansa, Rudy Lampe. Riba e rednan social, na radio y otro caminda, e docentenan ta reuniendo, y ta critica fuertemente contra e mandatario. Particularmente, pasobra e mandatario ta implementa cambio sin tene cuenta cu nan y sin consulta cu nan. E mandatario pa sorpresa, a indica cu e ta aprecia tur e critica cu tin den su direccion. De facto, e hecho cu tin tanto critica e dianan aki, no ta molestia e mandatario. Es mas, e mandatario ta contento cu esaki. “Mi ta aprecia e maestro critico y cu tin manifestacion di maestro” Lampe a bisa Noticiacla.com diahuebs durante conferencia di prensa. 

MESTER CRITICA

A puntra e mandatario pakico tin tanto rabia, disgusto y preocupacion di docente e ultimo dia- y simannan, tur pa e maneho di e mandatario. Pa sorpresa, e mandatario a contesta, cu e lo ta desapunta si no tin critica di maestro. “Nan ta e profesionalnan, cu ta pensa sumamente critico. Anto den e sentido ey, lo mi ta disappointed si e maestronan no ta critica y no ta protesta”. Segun Lampe, rond mundo esunnan cu ta critica y protesta ta juist e maestronan cu tin e formacion y ta prepara e futuro generacionnan. “Anto den e sentido ey, mi ta aprecia cu tin asina hopi reunion, cu tin asina hopi critica, cu tin asina hopi involvimento di nos maestronan. Pasobra esey ta mustra cu nos maestronan tin amor y pasion pa loke nan ta haci. Cu nan ta sacrifica nan tempo liber pa reuni y critica y protesta. Mi ta aprecia esey”.

SUGERENCIA 

Loke e mandatario ta sugeri ta, pa e docentenan trece e proposicionnan, e criticanan, unda cu e ora ey hunto nos por bisa ‘esaki ta bo critica, ban traha riba dje’. “Anto cu mucho gusto ami lo traha riba dje, pasobra nan ta e profesionalnan, y mi tin cu tuma nan serio. Pero en berdad mi kier sa en concreto exactamente kico ta e critica”.

PAKICO NO CONSULTA PROME

Ora cu Noticiacla.com a puntra e mandatario, pakico no a evita e critica y consulta prome cu e docentenan prome cu introduci su maneho, e mandatario a bisa cu esaki a tuma lugar debidamente, y a uza e PEN 2030 (Plan Educacional Nacional) como ehempel. Segun Lampe, pa e plan aki por a keda estableci, a consulta cu nan (docentenan) henter aña pa por a traha PEN 2030, y a consulta cu tur stakeholders. E mandatario a sugeri pa tira un bista riba e website, unda cu lo por haya un lista largo di consulta cu tur hende, pa cual a tarda pa anuncia e plan aki y no por a haci esaki na 2018 sino te na 2019.

CRITICA ORA DI PLAN NOBO

Segun Lampe, no por evita cu ora cu introduci un plan nobo, ta bin critica. “Ora cu un hende ta descontento den e mundo di enseñansa, y tin critica, esey ta algo positivo, pasobra e ta un hende cu kier ta involvi. Tur critica constructivo ta welcome” Lampe a sigi bisa. “ Si den un sistema di enseñansa, tin trankilidad, ‘there is something wrong’. Ora cu tur hende ta trankil, kiermen cu tur hende ta indiferente, no ta worry kico ta pasa. Mi ta aprecia cu e maestronan ta intrankil, pasobra nan tin pasion pa nan trabou,” e mandatario a finalisa bisando.