Minister a ricibi manifiesto for di e trahadonan di Serlimar cu a protesta

ORANJESTAD - Diahuebs mainta, Minister Otmar Oduber a ricibi e manifiesto di Serlimar di e grupo di trahadonan  di Serlimar.  Segun e mandatario, nos ta na un momento di cambio, cambio semper ta bin cu resistencia. Pa mas cu 70 aña no tabatin interes di kico ta pasa cu sushi, sinembargo awe algo cu tur hende tabata desprecia (cual ta e sushi), awe ta motibo di discusion.   

Minister Oduber a splica cu cada reunion cu tabatin cu e empleadonan di Serlimar, por a mira cu cada biaha a percura pa cumpli cu e palabracionnan haci. Awe a base di e compromisonan aki, a pidi comprension y duna siguransa na cada empleado, cu Gobierno lo keda para tras di Serlimar cu e ley cu tin na Parlamento. 

Importante a accentua ta segun e mandatario, cu e ley no ta pa crea monopolio, e no ta un ley cu ta bisa cu Serlimar so lo bay haci un trabou. E ta un ley cu ta bisa cu nos mester bay atende cu maneho di desperdicio, dunando e respet na cada compania segun nan tarea. “ Serlimar ta nos compania Nacional, Serlimar ta keda nos compania Nacional cu e tremendo tarea cu ta haciendo” Oduber a bisa.

Segun e mandatario, tur hende na Aruba mester realisa cu aki no ta trata di un decision individual, e ta trata di un plan cu Gobierno hunto cu tur instancia durante 1 pa 2 aña a hinca den otro, pa atende cu un problema grandi cu nos tin cual ta di desperdicio. “Nos sa cu e situacion na Parkietenbos ta inhumano y mescos cu esunnan cu a traha eynan, e bisindario tambe a sufri pa hopi aña! Cu e malesanan cronico pa esunnan mas cerca. P’esey mester percura pa tin un plan pa defende e salubridad y higiena di henter comunidad. Ta spera cu den forma unanime dentro di poco lo por aprob’e, demostrando nan sosten e or’ey tambe na e compania nacional. Y Serlimar su existencia ta manteni, pa para riba nan propio pia pa futuro” Oduber a finalisa bisando.