Minister a priminti e recherchenan, espacio adecua na otro edificio

MACUARIMA - Ekipo di Recherche di Playa, cu actualmente ta staciona na Centro di Husticia na Macuarima, lo haya localidad na e edificio di DOC opleiding. Asina Minister di Husticia Andin Bikker a priminti e grupo di recherche den accion awe mainta na Macuarima. Nan a drenta (manera NoticiaCla.com a raporta prome) den accion, pa motibo di falta di espacio adecuado pa traha. 

E SITUACION

Anteriormente e team aki tabata na Frankrijkstraat, pero debi na situacion di e luga cu tin schimmel, nan a muda pa Macuarima. Segun e mandatario, despues cu el a haya sa di e accion mesora a dirigi su mes pa Macuarima, pa pone su mes na altura di e situacion y pa yega mesora na un solucion. Mientrastanto a laga haci Frankrijkstraat limpi, unda a haci ‘luchtproeven’ pa mira si e aire ta saludabel, despues cu a drecha e murayanan cu schimmel. 

SCHIMMEL

Segun e mandatario, e pruebanan cu a drenta, ta mustra cu actualmente no tin schimmel mas na e edificio y Frankrijkstraat ta limpi. Tanto Minister Bikker como Korpschef Andrew Ho a bisa e grupo di recherche, cu nan tin comprension pa e situacion y ta haciendo lo maximo pa yuda e ekipo di Recherche di Playa, pa yega na solucion temporal.

DOC

Manera tur ‘bekabeling’ pa computer ta cla, recherche lo muda pa edificio di DOC Opleiding, caminda cu cada recherche lo tin un espacio apart, pa por atende publico y duna e servicio na e pueblo di Aruba.