Aruba a bolbe di ‘Panama Open 2019 Karate y Parakarate’ cu hopi medaya

Posted on 09/11/2019 11:26 am AST | Updated on 09/11/2019 11:27 am AST

ORANJESTAD - Recientemente (den weekend di 7 & 8 september 2019) e seleccion di Aruba Karate Bond  a participa na e ‘Panama Open 2019 Karate y Parakarate’, cu a tuma luga den ‘Arena Roberto Durán’ na Calle 116 Este na Panama City, Panama. E campeonato aki a conta cu un total di 700 atleta di 7 pais. Aki ta unda Aruba a sobresali tanto den categoria ‘kata’ (tecnica di karate) como ‘kumite’ (combate), treciendo cas 8 medaya (2 oro, 5 plata y 1 brons). 

Aruba Karate Bond ta felicita e atletanan; Janilaine Bello, Trinity Meza Orellano, Alejandro Gonzalez Lujan y Juan David Velasquez, cu nan tremendo resultado. Cada uno a drenta e campeonato cu un actitud positivo y ta logra awe loke nan a traha hopi luna duro p’e. Igualmente Aruba Karate Bond ta felicita e esfuerzo di e ekipo di coach, esta ‘Sensei’ Alberto Gonzalez Lujan (headcoach), ‘Sensei’ Luis Escalona (assistant coach) y señor Aldrick Maduro (Al Performance Training), pa nan dedicacion constante na e desaroyo di e cuater karatekanan aki.   

  • Powered by SETAR