SADA: Minister ta responsabel cu douaneronan ta den accion awe

Posted on 09/11/2019 10:52 am AST | Updated on 09/11/2019 10:57 am AST

ORANJESTAD – Manera anticipa, douaneronan a bay den accion diaranson mainta pasobra minister di finanza Xiomara Maduro no a cumpli cu palabracion haci pa cu e structura salarial acorda for di 2017, e asina yama salarishuis. E ta un structura cu ta percura pa douaneronan haya cierto pago. For di 2017 gobierno di e tempo ey a acorda esaki, y e gobierno actual na 2018 tambe a acorda e mesun plan. Pero e siman aki e minister (Maduro) a informa cu no tin placa y como tal no por sigui cu e plan. Ademas, segun e mandatario a bisa e presidente di e sindicato, cu e lo crea un precedente cu otro ambtenaarnan cu otronan tambe kier 'rechttrekking', esta coreccion riba nan posicion huridico. E presidente di sindicato SADA,  Eduard Maduro diaranson mainta a bisa NoticiaCla.com cu esey ta coi kens pasobra pa bo por haya un rechttrekking manera cu nan (SADA) ta pidiendo, bo mester ta den proceso di reorganisacion. Y esey ta algo cu e otro departamentonan no tin aworaki, sino solamente esun di douane. 

ACCION Y TRAHA BEK

Maduro (SADA) a confirma cu tur douanero ta den accion y cu ta e hefenan lo ta manehando e postnan ‘bashi’, aunke no ta kere cu nan (e hefenan) por ocupa tur. Tanten cu no tin confirmacion cu lo haya nan placa paga, conforme e salarishuis, y paga cu forza retroactivo cuminsando cu e salarisnan na November, e accion lo sigui.  

CASO DEN CORTE

SADA ta conciente cu por bin un caso sumario pa forza trahadonan pa bay traha bek, pero ta mucho tempran pa bisa si nan lo traha bek si sentencia bin den nan contra. Nan tin cu wak prome kico e sentencia ta bisa y kico e trahadonan ta dicidi. Cu e ta afecta comercio, ta un consecuencia, pero pa esey e minister ta responsabel cu awor e douaneronan ta den accion. 

DIRECTOR 

Director di Douane Ricky Croes a informa NoticiaCla.com diaranson mainta, cu 'e asunto ta algo contra minister'. Pues por compronde cu e no por a duna un comentario riba e tema. "Nos ta haci nos best pa no perhudica economia. Pero semper y cuando nos keda den margen di ley", Croes a bisa. Tambe el a sigura cu ta tratando tur posibel pa e departamentonan di douane afecta, por sigui duna servicio toch awe mainta. 

  • WC4
  • Powered by SETAR