Ghatim Kabbara: Acoya ta satisface un demanda cu tabata falta (na Corsou)

WILLEMSTAD – Acoya Hotel Suits and Villas su apertura oficial ta diaranson awor, pero operacionalmente e ta activo algun luna caba. Y for di e momento ey, su derecho di existencia a keda rapidamente confirma. Por lo menos segun huespednan cu ya tabatin e honor di bishita e propiedad unico aki. E yegada di e resort aki ‘ ta pa satisface un demanda cu tabatin no solamente den Caribe pero a nivel mundial’ segun Ghatim Kabbara, -Head Business Development di e proyecto-, na NoticiaCla.com recientemente.

CONCEPTO

Kabbara , cu no ta un desconoci den mundo di turismo (e ta e.o. ex director di oficina di turismo di Corsou) ta referi na e bishitante di Acoya, como e concepto di e turista cu tin un cas of apartamento; e comunidad di ‘un cas leu fo’i cas’. Cifranan ta demostra cu esey tabata algo necesario. Kabbara ta mustra cu a logra desaroya e concepto ey na Acoya, esta ‘e cas full ekipa leufo’i cas, cu un garantia di servicio’. Un persona cu conoce e servicio di hotel, ta haya e servicio ey awor na Acoya.

TIME SHARE

Mientras cu e concepto ta zona manera esun di time share, Kabbara ta sigura NoticiaCLa.com cu Acoya ‘ no ta un timeshare’. Aunke mes momento Acoya no ta descarta su mes na ningun modelo comercial specifico. “Awor nos ta simplemente un ‘vacation home rental resort with hotel services’”. E reaccion simplemente cu potret ta duna un impresion di un propiedad super luhoso, y cu aki ta trata di algo sumamente costoso. Segun Kabbara, e portofolio varia di Acoya sinembargo ta pone cu tin algo pa tur hende. For di e camber studio cu su baño cu ta cuminsa di e tarifa di 120 dollar, depende di e acomodacion y crece, te na un vila cu ta hospeda 10 hende den 5 camber, 4 baño y un piscina priva. E ta un portfolio varia dinamico cu por wordo adapta na e demanda. “Nos por adapta e prijs tambe dependiendo con e mercado ta move. Bo ta haya hopi calidad pa loke bo ta pagando”.

REACCION

E reaccion inicial cu Acoya a haya di su huespednan ta mas di loke nan a spera. Nan tabata sa si, cu nan tabatin un proyecto unico na Corsou y region di Caribe. “Semper nos ta hopi enfoca riba e producto pa e tin un prijs rasonabel pa e turista. Na final ta e turista ta esun cu ta manda. Ta nan ta bisa nos si nos ta haci ‘e bon of no” Kabbara a bisa. Aki un aña berdaderamente nan lo por mira con bon nan a haciele.

PLAN

E planeamento di e operacion tabata di tal forma cu dado momento e popularidad di e resort subi, y nan encontra un ‘boom’ den loke ta ocupacion, nan por atende cu esey. Y for di comienso nan a nota un aumento continuo di bishitante na e resort. “ For di momento cu no sa tene nos soft opening na juni, semper tabata comunica cu huespednan cu nos tabata den e fase di construccion. Pero e huespednan tabata exigi cu nan tabata kier a keda aki. Esey a bisa nos pa haci un esfuerso extra pa a traha pe. Nos tin hopi ambicion di ta un resort di referencia” Kabbara ta sigui bisa.

PERSONAL

E personal cu nan tin ta profesional, for di e gerente general, te na e empleado mas noble, y di tur tin algo special. A busca un ekipo humano special, cu a keda seleccion a base di varios criteria manera experiencia hotelero, pero sigur e caracter, actitud di con resolve problema.

MARRIOTT

Algun bishitante a cuminsa compara Acoya cu un resort di calidad manera Marriott. Pero segun Kabbara, nan intencion no ta pa wordo compara cu otro hotel. “Nos kier ta e miho resort cu nos por ofrece pa nos clientenan”. Esey no ta kita afo cu Kabbara ta considera un comparacion di Hyatt cu Acoya. “E ta un alago cu e ta compara nos cu Marriott. Esey ta un bon alago. Marriott ta un cadena hopi importante. Nan a compara nos tambe cu otro hotel di calidad. Pero ta tempran pa bisa cu nos ta den e mesun categoria. Ainda nos tin cu ‘prove ourselves’ y nos kier comparacion hopi aworaki. Nos tin cu gana nos propio reconocemento den e mercado.

MERCADO ARUBA

Pa loke ta e region, particularmente Aruba, Kabbara ta mustra cu sigur e ta un mercado importante. “Mercado di Aruba ta hopi importante pa e turismo di Corsou. Tin hopi tipo di turismo for di Aruba. Tin turismo di evento, di negoshi, familiar. Hopi rason entre Aruba y Corsou pa bula. Nos ta logra satisface tur e motibonan pa un arubiano bula bin Corsou” Kabbara ta finaliza bisando.