Douaneronan ta drenta den accion diaranson mainta

ORANJESTAD – Cuerpo di douane lo ta full plat mañan, esta diaranson. Asina presidente di sindicato di e douaneronan, Eduard Maduro, a confirma pa Noticiacla.com diamars atardi. E motibo ta e carta cu nan a ricibi di minister un dia prome, cu ta mustra cu no ta bay respeta e ‘salarishuis’ y ‘functiehuis’. Ambos ta e structuranan estableci for di 2017 y cu tanto Minister Presidente Wever y Minister di Finanza Maduro a bisa e sindicato, cu nan lo respeta. Sindicato a convoca un reunion urgente diamars, cu e resultado cu diaranson mainta 8’or no tin douane trahando, te ora cu gobierno bolter e decision bek. 

E CASO

Segun Maduro, ta for di 21 luna (casi dos aña), gobierno actual a bin ta priminti e sindicato, cu nan lo respeta e convenio firma na juli 2017, pa loke ta e ‘salarishuis’ y ‘functiehuis’. Pero dialuna durante un reunion, e mandatarionan a cambia y a bisa cu nan kier ‘habri’ e convenio bek, esta cu kier trece cambio na esaki. E miembronan di e sindicato a considera esaki como un ‘baño di awa friu’, y ‘un cuchiu den lomba’ di e trahadonan. “Tur e tempo a priminti y awor ta cambia full e scenario” Maduro a sigui bisa. Algo cu e miembronan di douane no a acepta. 

CARTA

Como tal a manda un carta diaranson atardi laat na Minister Maduro, informando nan di e decision di pone douane plat. “E buchi a yena y e miembronan a dicidi unanimamente pa sin mas, bay den accion” e carta ta bisa entre otro. “For di mañan mainta 8’or nos trahadonan lo pone trabou abou y no reanuda esaki, te ora cu concede cu no mas tarda, pa pago di salario di november 2019, cu lo implementa e pagonan cu forza retroactivo te na januari 2018 di e acuerdo cera. Mi ta lamenta cu mi no por informa bo otro, pero e miembronan a papia”, Maduro ta finalisa e carta cu a bay pa minister.  

 Lesa e carta di SADA na minister AKI.