Oduber: Otmar Oduber a bira mal minister pasobra a nenga MetaCorp un cos

ORANJESTAD – Minister Otmar Oduber no ta compronde con bin, e ta un mal minister, pasobra el a nenga famia de Veer un solo cos, mientras cu di otro banda a dun’e tur otro cos. Segun e mandatario, semper a complace famia de Veer y a acomoda nan unda cu tabata por. Oduber a tene su conferencia di prensa pa contraaresta e memo cu NoticiaCla.com a publica dialuna pa e trahadonan, informando nan di e posibilidad di ceramento di varios compania debi na maneho di Oduber. E mandatario ta lamenta cu MetaCorp ta malinforma su trahadonan cu posibel cierre. Oduber ta sigura e trahadonan cu esaki no ta berdad. Un cos cu Oduber ta admiti di a nenga MetaCorp, ta e parti di e incinerator y e procesamento di sushi pa manda esaki den exterior (Colombia). 

SORPRENDI

“E carta a sorprende mi” Oduber a bisa riba e memo di MetaCorp na e trahadonan. Sigur despues di e trato cu el a bin ta duna famia de Veer durante e gabinete aki, pasobra e tin un aprecio y respet grandi pa e bon trabou sublime cu nan a bin ta haciendo pa casi 100 aña. E ta papia tambe di e varios reunionnan, cu el a tene cu e miembronan di MetaCorp, indicando cu nan (taba)tin un bon relacion cu otro, pa awor e bin lesa cu su nomber ta menciona como 3 biaha den un forma negativo. Cu e sa, ta un proyecto so a fracasa di de Veer cu ta Ecogas y esey nan tin cu acepta. Cu ta stroba nan di celebra 100 aña tampoco ta cuadra, pasobra hasta tereno a yuda duna nan, pa por traha cinema riba cual nan ta construyendo caba.

DEBE Y BESLAG

Oduber a contra aresta e peticion di beslag di Ecogas riba Serlimar, splicando e portal aki cu mas tempran den dia mes, Serlimar a paga e debe cu e tabatin pa cual Ecogas kier a pone un beslag. E ta lamenta si, cu esaki ta sosode, siendo cu e compania ruman, Ecotech, tin un debe di mas di 800 mil florin na Serlimar cu no a paga ainda. E no ta compronde con e compania (MetaCorp) ta bay haci un paso asina, siendo cu bo tin contract cu un socio, pa 4 pa 5 miyon pa aña y ta bay pidi pa pone beslag riba un suma, manera esun menciona di 190 mil florin. 

DEBE CU WEB

Pa loke ta e debe cu WEB, MetaCorp a sigura cu no tin debe (pero NoticiaCla.com no por a comproba independientemente si esey ta berdad), Oduber a sigura cu tin un debe miyonario di pasado cu WEB, riba e tubonan cu no a bay bon. Pero aki tambe, Noticiacla.com no por a verifica esaki ainda, si e parti ey ta cuadra cu berdad. Pues basicamente tin dos persona cu e versionnan, cu mester verifica ainda. 

MONOPOLIO

E hecho cu Ecogas y Ecotech ta mustra cu tin monopolio, tambe Oduber ta refuta. Berdad, segun e ley cu lo trata den parlamento proximamente, tin solamente 4 punto riba cual Serlimar tin monopolio, pero esey ta e puntonan (e trabounan) cu ningun otro compania ta ocupa cu ne aworaki. Pues no por papia di kita trabou di hende. Como tal, segun Oduber, MetaCorp no ta papiando berdad y ta malinforma su trahadonan. 

POSIBEL WELGA

Tin informacion cu lo tin un welga planea pa e trahadonan di e companianan, cu ta resorta bou di MetaCorp, pa diabierna awor. Segun Oduber, e tambe a tende di esey, pero no cu ta e trahadonan mes kier, sino cu ta manda nan pa welga. E ta sirbi e interes di e doñonan y cu ta e doñonan di MetaCorp ta bisa e trahadonan pa nan bay welga. NoticiaCla.com e siman aki a puntra e doñonan riba esaki y nan a mustra cu si ta pa e trahadonan, masha tempo nan lo a welga, pero cu ta e doñonan tin e welga wanta, pa duna mas tempo pa dialogo. ‘Pero ta un hecho si, cu e trahadonan ta hopi rabia’, a bisa Noticiacla.com mas tempran den siman, ora cu a toca e tema aki.