Oduber: De Veer mester splica con e ley di Serlimar lo cera su negoshinan

ORANJESTAD – “Nan (lesa: Eduardo de Veer di MetaCorp) mester splica nan empleadonan den ki sentido e ley ta pone cu nan mester cera nan negoshinan”. Esey tabata e prome reaccion breve di minister di medio ambiente Otmar Oduber riba e memo cu MetaCorp a saca ayera pa su empleadonan riba e situacion critico di nan negoshi.  E liña cora den e memo di MetaCorp ta, cu Oduber su pasonan ta percura cu mester cera dos pa tres negoshi di MetaCorp. Segun Oduber na NoticiaCla.com, ta ora cu MetaCorp splica con e ley por haci esey, e lo por duna un miho reaccion. 

DEBE PLACA

Ademas, segun Oduber, “ E ley no ta culpable cu EcoGas ta un fracaso y cu nan debe hopi placa (miyones) na WEB”, Oduber ta sigui bisa. “Esey lo por ta un motibo pa cual nan (lesa:MetaCorp) lo mester cera Ecogas”, e mandatario a sigui bisa. Mas e no kier a comenta riba e tema. Mientrastanto el a convoca un conferencia di prensa riba e tema, specificamente e memo cu MetaCorp a saca pa su empleadonan.