Sue-Ann Ras a despidi como parlamentario durante ultimo reunion dialuna

ORANJESTAD – Den un disertacion cu a mustra emocional y ‘to the point’, parlamentario Sue-Ann Ras a dispidi di su coleganan parlamentario dialuna, durante e ultimo reunion di Parlamento 11. Manera ta conoci, Ras a anuncia su retiro, despues cu el a haye den un situacion na Hulanda, unda cu un periodista Hulandes a gar’e ta wak Netflix (na casi final di un reunion) durante un reunion di IPKO. Aunke cu a haci apelacion riba dje, el a dicidi despues, cu e ta para riba su retiro y a bay di acuerdo pa haci esaki pa cu e ultimo reunion di e parlamento. El a mustra si, cu no ta ultimo biaha cu bo lo tende di dje. “Mi kier pone enfasis cu mi ta retira awe como parlamentario, pero no como politico y sigur mi ta sigui haci mi trabou pafo di parlamento, cu mesun pasion y dedicacion riba tereno social y di enseñansa” Ras a bisa.

SU DISCURSO

Ras a cuminsa su discurso, citando un frase di ex presidente Barack Obama, pa pone mesora e tono di su discurso. “Cambio no ta bin, si nos sinta warda riba otro hende of otro momento. Nos ta esunnan, cu nos tabata warda riba dje. Nos ta e cambio cu nos ta buscando,’ ta un gran berdad cu ex presidente di Merca, Barack Obama, a yega di expresa” Ras a cuminsa cu su discurso. El a enfoca tambe riba su ‘achterbaan’ pa sigura nan cu nan voto riba dje, no tabata envano y cu e lo sigui traha pa nan, pafor di Parlamento. “Mi no kier pa entre otro, mi votadornan sinti niun momento so, cu nan voto no tabatin balides. Al contrario, mi ta desea pa nan tambe, mescos cu mi, wak cu nan voto a nifica e cambio cu tanto nos ta anhela den politica” Ras a sigui bisa. Pa Ras, ta trata di ‘e cambio, unda cu nos ta bay bek na nos norma y balor y amor inmenso y sincero pa nos pais Aruba y su hendenan’.  Ras a probecha di gradici tur esnan cu a yud’e, sosten’e y a percura pa e ta e persona cu e ta awe. E palabranan cu tabata mustra di curason y cu por nota cu e ta bandona Parlamento cu sentimento mixto. Na final, el a haci un apelacion fuerte na su coleganan: “Den e funcion aki, sigui ta mas critico ainda, investigativo y mas coherente cu ta posibel, paso nos funcion primeramente como parlamentario ta, di controla gobierno y salvaguardia interes y bienestar di pueblo. Pone interes propio un banda y percura pa abo ta realmente un sirbido di bo pueblo, di bo votadornan y particularmente di nos futuro generacion,” Ras a bisa. “ Prestigio, respet y credibilidad bo ta gana cu coherencia entre loke bo ta bisa y loke bo ta haci, mescos cu loke un ciudadano ta exigi di su mandatarionan y loke nan ta exigi di nan mes como ciudadano. Nos ta ehempel a traves di loke nos ta bisa, loke nos ta haci, loke nos ta evita y loke nos ta permiti” e awor ex parlamentario a sigui bisa. “Nos actitud-, gesto- y expresionnan sigur ta ehempel pa otro. Nos ta converti den un modelo pa sigui, si realmente nos esforsa nos mes, pa ta un miho persona, sabiendo cu cualkier mucha, hoben of adulto ta wak nos actua y reacciona, durante diferente tipo di situacion. P’esey ta di vital urgencia pa traha riba codigo di conducta pa un parlamentario, unda ta exactamente describi tur su obligacion-, derecho- y exigencianan, manera ta e caso cu cualkier empleo”. No ta conoci kico Ras lo bay haci awor, aunke cu gobierno a pidi pa sigui yuda nan cu e proyectonan cu mester atencion y cu e ta domina bon. Su reemplazante Luigi Bergen, lo tuma e funcion manera cu e huramenta na Gobernador di Aruba. Lesa e disertacion completo AKI.