Corsou lo hunga contra Haiti toch pa honra memoria di nan fayecido keeper

ORANJESTAD – E seleccion nacional di Corsou a dicidi cu nan lo hunga e wega contra Haiti diamars, na memoria di nan keeper, Jarzinho Pieter, cu a fayece repentinamente dialuna mainta na Haiti. Prome Minister di Corsou, Eugene Rhuggenaath, a confirma e informacion aki riba su pagina di Facebook dialuna merdia. E pregunta tabata si despues di e morto repentino, kico lo a pasa cu e wega di diamars mirando e situacion. Pues decision a cay den e seleccion, cu e miho forma pa honra memoria di e keeper ta, pa e wega sigui toch. E wega ta poni pa diamars atardi 6’or. 

E CASO

Manera ta conoci y a keda raporta dialuna mainta pa NoticiaCla.com, e keeper di reserva di e seleccion di Corsou, Jarzinho Pieter, a fayece diripiente na Haiti dialuna. E seleccion ta na Haiti pa preparacion pa nan partido contra e pais anfitrion diamars. Diasabra caba e seleccion di Corsou a gana e seleccion di Haiti cu score di 1-0 den torneo di CONCACAF Nations League. Motibo di e morto repentino no ta conoci ainda. Keda pendiente pa mas informacion.