Alvin Koolman a retira ‘per direct’ como director di RdA

Alvin Koolman a retira ‘per direct’ como director di RdA

Posted on 09/9/2019 4:15 pm AST | Updated on 09/9/2019 4:44 pm AST

ORANJESTAD – E anuncio di retiro repentino di director gerente di Refineria di Aruba (RdA), Alvin Koolman, dialuna atardi a cay como un sorpesa pa hopi. Den un carta di 3 pagina, Koolman ta splica su motibo. Ademas a yama un conferencia di prensa, pa awe tardi 4:30pm pa mas informacion. For di e carta di retiro, ta nota cu e motibo principal ta e relacion (of falta di dje) entre Koolman y gobierno (accionista principal) y e ‘clash’ cu por tin entre gobierno y e directiva. “Y ora cu mi a wordo contesta cu Prome Minister ta sigui opinion di e mesun conseheronan aki (cu lo a conseha algo otro cu Koolman a bisa), mi no tin nada otro di conclui cu mi opinion, no ta ser balora ni personal ni como director di RdA”, Koolman ta bisa dado momento den e carta (cu NoticiaCla.com lo publica integralmente mas abou). Koolman ta papia di situacion frustrante entre gobierno y esunnan cu ta maneha e refineria y menasa di schors su persona, pasobra e lo no kier ‘hinca palabra polemico’ den e articulonan di un MOU, unda cu el a dicidi e ora di ‘keda nada otro di entrega mi retiro di immediato”. Tambe e ta duna indicacion cu esunnan cu lo ta ‘negoshando’ pa un reapertura, lo no ta haciendo esaki bin y cu lo por ta ripitiendo e hecho cu ‘Gobierno di Aruba no sa negosha cu e instancianan multi-nacional’. Ta papia entre otro di un tax holiday cu gobierno no mester a duna na 1997, cu a pone cu Aruba a perde ‘miyones’ durante e ‘golden years of refining’ entre 2004 y 2007. Tambe Koolman ta papia di cu ‘pa falta di negosha cu Valero mes, cu a perde di por a haya un expansion di un Hydrocraker complex, cu por haci cu Valero Aruba ta operando ainda’. Ta hopi cla cu Koolman no ta contento con e forma di negosha ta bayendo ni con gobierno ta bezig ta ‘maneha e situacion’. Lesa e carta completo AKI. Potret di archivo di e ultimo conferencia di Koolman na february di e aña aki. 

  • Powered by SETAR