Leynan pa aumenta edad di pensioen y BBO aproba den parlamento

ORANJESTAD – Tanto e ley pa aumenta edad di pensioen como ley pa aumenta BBO den forma di un health tax a pasa den Parlamento diamars marduga, ambos cu 12 voto pro y 8 contra. Tabata despues di un reunion maratonico den Parlamento, e respectivo leynan a pasa. Hunto cu nan a pasa tres mocion di cual dos tabata di AVP. E prome mocion di AVP a apasa cu 12 voto pro y 8 contra, e mocion di Democracia Real a pasa unanimamente cu 20 voto, y e ultimo mocion tabata di AVP cu 12 voto pro y 8 contra. Den curso di dia lo amplia mas riba e contenido di e leynan. E siguiente ley ta e presupuesto di e Tourism Product Enhancement Fund cu lo cuminsa pa 10’or di mainta.

For di mainta tempran e reunion a cuminsa, y a dura henter dia cu algun interumpcion. Fraccion di Mep a mustra nan desaprobacion pa cu e leynan, usando como argumento cu gobierno a priminti algo y haci otro, referiendo na entre otro e BBO. Durante campaña electoral a boga pa kita BBO, y awor ta aumente den un forma di health tax. Minister president Mike Eman a mustra cu e la haci esaki, pero riba peticion di e.o. gremionan cu a mustra cu esaki ta e miho manera pa sigui, pa por drecha e situacion. Pa loke ta APFA, cu e reforma di ley pasa, gobierno ta sigura cu e injeccion di 170 miyon, cu e fondo ta 100% cubri, contra e 70% tempo di partido di MEP. MEP ta argumenta cu esaki no ta e caso y cu no tabatin necesidad pa aumenta e edad di pensioen, y por a logra e fondo na otro manera.