Oduber: Pa garantisa e sostenibilidad di e fondo di AZV mester focus riba prevencion

ORANJESTAD - “Un pashent diabetico ta costa e fondo di AZV mas o menos 8600 florin pa aña,” asina ministerio di salud ta bisa den un comunicado. Segun e comunicado, e fondo di AZV tin su retonan. Nos ta biba den un comunidad cu no ta esun di mas saludabel, nos populacion ta den ‘vergrijzing’ y consecuencia cu esaki ta trece cu ne ta, cu hopi hende ta sufri di e malesanan cronico. E gastonan medico ta keda subi tur aña y p’esey ta importante pa nos comunidad ta informa, kico ta e situacion y ta bira mas consciente di nan manera di biba.

Na Aruba 70% di nos comunidad tin sobrepeso, di cual 36% ta obeso. Na e momentonan aki tin mas cu 8600 pashent, cu ta registra como diabetico. Esaki den comparacion cu 6 aña pasa, cu ta un aumento di 18%. Esaki ta indica cu den transcurso di e ultimo añanan, nos comunidad a bay atras den nan salud, a bira mas ‘ongezond’ cu tur e consecuencianan cu esaki ta trece cu ne.

E gastonan cu un pashent diabetico ta trece cu ne pa e fondo di AZV tambe ta alarmante. Un pashent diabetico ta costa e fondo di AZV mas o menos 8600 florin pa aña.

Hopi di esunnan cu ta diabetico mester haya dialisis tambe. Por lo general por preveni 75% di e casonan di dialisis, pasobra e causanan mayor di e problema di riñon aki ta sobrepeso, diabetes y presion halto. Un pashent di dialisis ta costa e fondo di AZV 90 mil florin pa aña.

Por preveni e malesanan cronico, pero esakinan ta rekeri un cambio di estilo di bida. Un bida mas saludabel, un bida di haci ehercicio y come saludabel.

Pa por hiba un bida saludabel mester ta fisicamente activo. Sea bo ta cana, core bicicleta of practica un of otro deporte y cualkier forma di recreacion activo manera baile, yoga of tai chi.

“ Como minister encarga cu salud, mi meta y vision ta crea un sociedad saludabel, inverti den prevencion den salud. Crea un pais, caminda tur hende ta bira mas consciente di e consecuencianan di no hiba un bida saludabel y promove e beneficionan di hiba un bida saludabel. Mi ta sinti cu esaki ta mi deber y obligacion, pa di e forma aki baha e mortalidad na Aruba y tin un pais mas saludabel. Na final nos kier pa e fondo di AZV ta uno sostenibel. E seguro medico general cu nos tin na Aruba, ta di e paisnan desaroya manera; Singapore y e paisnan Europeo si tin un seguro medico general asina aki. Pa por garantisa e sostenibilidad di e fondo, nos tur mester ta consciente si cu esaki ta rekeri un cambio di mentalidad riba e pais aki, den sentido di purba hiba un bida mas saludabel”.