Gran parti di Aruba sin coriente diasabra atardi pa 7 ora largo

ORANJESTAD – Varios parti di Aruba diasabra atardi a keda sin coriente pa mas of menos 7 ora. Un boiler cu a trip na WEB, a causa interupcion den e suministro di coriente na Elmar. Esey tabata e prome raportahe oficial di WEB, pa cu e situacion di coriente. A raporta cu tabata evita pa tin un blackout total, p’esey a cuminsa ‘schakel’ entre e areanan constante y evita presion total riba e planta. Sinembargo un ora y mey despues, atrobe cos a bay robes. “ WEB ta encontra storing di nobo den planta, cu consecuencia un biaha mas cu mester interumpi coriente. Ta kita coriente di cierto area di nobo pa evita blackout total”. A manda mensahe bek dos ora, despues cu tabata calcula cu lo a tuma mas o menos 2 ora pa e produccion bira stabiel. Pa mas of menos 9:35pm cos a normalisa atrobe pa practicamente full Aruba. “Entretanto nos e recupera e produccion di coriente 100% na ELMAR. Consecuentemente ELMAR ta conecta cu e areanan y cada cas. Un biaha mas ta ofrece disculpa, pa e inconveniencia y ta gradici pa e comprension”, e mensahe final a bisa. Critica tabata hopi riba e rednan social, unda cu e hendenan no por a caba di compronde, pakico awe ainda tin problema di coriente y cu e ta bay ‘tanto biaha asina’. Mientras cu WEB a mustra cu e situacion a normalisa, ainda no a haya un update oficial, di kico finalmente a causa cu Aruba no por a haya coriente bek mas liher diadomingo y pakico a dura 7 ora pa reestablece e situacion.