Na Hulanda e personal di tera di KLM ta welga diadomingo awor

SCHIPHOL – Personal di tera di e aeroliña KLM ta welga diadomingo merdia pa 4 ora. Asina nan ta raporta diabierna. E welga aki ta surpasa e ultimo di e siman aki, cu a dura 2 ora y pa cual mester a cancela docena di buelo. E sindicato FNV a anuncia e welga. “Si KLM no kier cera un CAO drechi y si despues di dos accion no a reacciona, bo mester intensifica bo accion” e presidente di e sindicato, Jan van Brink, a bisa.  “Nos ta mira cu e deseo pa accion ta grandi. Y comprendibel. Si e personal di tera no haci nan trabou, mester cancela buelo. Trabou importante pues, cu merece un bon CAO”. 

CONFLICTO LABORAL

Mayoria sindicato despues di un oferta nobo di KLM a bisa cu nan kier a sinta na mesa atrobe, pero FNV tin otro pensamento riba esey. E sindicato ta pensa cu e proposicion pa aumenta salario den tres aña cu 6 porciento, mucho poco. FNV kier minimo aumento di 4% y banda di esey, miho schedule di trabou y mas contracto definitivo. Segun KLM, e exigencianan aki ta mucho golos y cu e aeroliña no por duna su mes e ‘luho’ ey.