ATIA kier gobierno bin cu un reforma fiscal integral

ORANJESTAD - ATIA ta boga pa un reforma fiscal integral. Asina e gremio comercial a vocifera na prensa, despues di a sinta dos dia cu gobierno, durante e sesionnan di reforma fiscal. Manera ta conoci, Departamento di Impuesto conhuntamente cu e taskforce di impuesto di gobierno, a organisa un encuentro di dos dia cu sector priva pa presenta y haya reaccion y e sugerencianan riba e propuesta cu nan lo kier presenta na gobierno encuanto e reforma fiscal. ATIA tambe tabata presente durante e dos dianan. Desde momento cu gobierno actual a sinta, ATIA a presenta un plan pa un reforma fiscal integral. 

REFORMA FISCAL INTEGRAL

Durante e sesion di diaranson, ATIA a enfatisa e importancia di introduci un reforma fiscal integral, pa asina por tin un bista global y corecto di tur e cambionan y ki efecto total nan tin riba varios aspecto, manera costo di haci negoshi, inversion, crecemento economico, etc. Algun di e preocupacionnan cu ATIA a vocifera durante e encuentro aki ta e costonan halto pa haci negoshi na Aruba y e falta di cumplimento di e debernan fiscal, cual ta crea un competencia inhusto pa esunnan cu si ta cumpli cu pago di nan impuestonan, un asina yama “unlevel playing field”. Den su presentacion, ATIA a pidi gobierno pa laga sector priva haya e leynan, pa repasa prome cu nan yega parlamento, pa asina por haci un evaluacion profundo di loke cada cambio lo encera y ki efecto nan lo por tin, cual a keda confirma pa Minister President.

E CAMBIONAN LO HISA COSTO DI HACI NEGOSHI

Departamento di Impuesto a presenta un propuesta, caminda lo introduci algun elemento riba 1 di januari 2020 y algun cu lo introduci den un siguiente fase. Lamentablemente, mester a constata cu e cambionan cu lo introduci na januari 2020, ta solamente e cambionan cu lo hisa e costonan di haci negoshi. E cambionan fiscal cu lo mester trece un poco alivio pa comercio y comunidad, posiblemente lo introducie den un sigiente fase. 

ATIA ta aprecia cu a organisa e sesionan aki y a duna sector priva un oportunidad pa comparti pensamento riba e cambionan fiscal. Sinembargo, ta lamenta cu esaki a tuma lugar asina laat den e proceso, cu consecuencia, cu no ta keda e opcion di considera otro alternativa. Ademas, ATIA lo a prefera di wak un plan integral, caminda no ta solamente reforma e impuestonan indirecto, pero simultaneamente ta baha e impuestonan directo, asina creando un balans den e peso cu ta poni riba comercio y comunidad di Aruba. 

Mester tene na cuenta tambe cu mester duna economia tambe e espacio pa crece y crea un ambiente atractivo pa e inversionnan, crecemento di e companianan local of estableci localmente y entrepreneurship. 

Nos tur ta compronde cu mester hisa entrada di Aruba, pa por paga e debenan di pais, pero un otro manera pa aumenta entrada di gobierno ta p- medio di hisa cumplimento di e debernan fiscal, atrae e inversionnan nobo y baha e gastonan den e aparato gubernamental. Di e manera aki, cada ken ta contribui na un manera husto na bienestar di e pais. Aunke Minister di Finanzas y Economia a duna di conoce, cu ta trahando riba e gastonan di gobierno y cu te awor a logra corta hopi den e gastonan aki, no a duna claridad riba e pasonan concreto ni riba e suma cu a logra corta te cu awor. Lo ta bon pa por haya un bista riba esaki.

Minister President a cera e encuentro bisando cu gobierno y Departamento di Impuesto lo repasa tur e preocupacionnan, e sugerencianan y e preguntanan cu a bin dilanti durante e sesionnan y lo invita sector priva un biaha mas, pa sinta hunto y delibera riba e posibel ahustenan na e propuesta presenta diahuebs.