Hulanda ta yuda Aruba cu 10.9 miyon florin pa crisis Venezuela

ORANJESTAD - Hulanda ta yuda Aruba cu 10.9 miyon florin pa e crisis di Venezuela. Asina Prome Minister di Aruba, Evelyn Wever Croes, a informa publicamente diabierna mainta, pa medio di un comunicado. Segun e mandatario, na luna di mei cu a pasa, Hulanda a indica cu e ta dispuesto pa yuda Aruba y Corsou pa atende cu e crisis di Venezuela cu 23.8 miyon Euro cu ta alrededor di 55 miyon florin. Un gran parti di e 55 miyon florin Hulanda lo uza pa e mes yuda nos, y pa e otro parti Aruba y Corsou mester a entrega nan lista di plan y proyecto. 

ACUERDO

Wever-Croes awe mianta 9or, ora di Aruba, a anuncia cu a yega asina leu cu Hulanda y Aruba a yega na acuerdo cu Hulanda lo duna e 10.9 miyon florin pa yuda  Gobierno di Aruba, pa enfrenta e crisis Venezuela. Na e mesun momento, a haci e anuncio aki na Hulanda tambe.

KICO E AYUDO TA

E 10.9 miyon florin aki ta bay pa fortifica Aruba como pais, den haci Aruba mas sigur, pa asina atende cu e crisis miho posibel. E ta pa yuda Aruba pa controla nos fronteranan miho, p’asina nos percura pa domina e crisis cu nos tin internamente. Control riba lama y tera lo bira mas estricto, pa asina evita importacion ilegal di e sustancianan, arma como tambe di persona. E tema di ‘mensenhandel’ y ‘mensensmokkel’ (traficacion humano) ta un problema serio, cu ta tumando luga demasiado hopi den nos region. Pa esaki lo inverti den ampliacion di Kustwacht, pa patruya nos awanan y asina evita importacion ilegal, y transporte ilegal di hende.

CAPACIDAD DI DETENCION

Tambe cu parti di e placa aki lo amplia e capacidad di detencion, unda esunnan ilegal por keda, mientras nan ta warda e fecha cu ta manda nan bek nan pais. Esaki den e tempo aki ta hopi importante y necesario, mirando e fluho di ilegalidad na Aruba a aumenta. Ampliacion di e capacidad di detencion lo trece mas trankilidad. 

ENSEÑANSA TEMPORAL

Parti di e fondo aki lo uza tambe pa enseñansa temporal, pa e muchanan cu ta bin for di Venezuela, cu no por drenta nos scolnan, pa garantisa cu nan ta haya educacion durante e tempo cu nan ta na Aruba. Asina evita cu nan ta bira un peso pa comunidad y evita mas problema social. 

NO PA VIVIENDA

Ta bon pa remarca si, cu e placa aki lo no ta disponibel pa crea vivienda of cubri otro gasto di e personanan cu ta bin haci peticion di asilo. Tampoco ta uza e placa pa cubri e gastonan di operacion di Gobierno. E placa aki ta bay pa fortifica Aruba como pais, den haci Aruba mas fuerte y mas sigur, y asina por atende cu e crisis miho posibel.