Oficina nobo di DCNA oficialmente habri na Bonaire

Oficina nobo di DCNA oficialmente habri na Bonaire

Posted on 09/6/2019 10:41 am AST | Updated on 09/6/2019 10:41 am AST

KRALENDIJK - Minister Carola Schouten di Hulanda (Agricultura, Naturalesa y Calidad di cuminda) a efectua apertura di e oficina nobo di Dutch Caribbean Nature Alliance. Esaki a tuma luga hunto cu Gezaghebber, Edison Rijna, durante su bishita di trabou na Boneiro. Na e ocasion aki, DCNA a pidi atencion urgente, pa mantencion di e beyesa natural na Caribe Hulandes. E seis islanan di Caribe Hulandes ta conoci pa nan naturalesa bunita y diverso, y mantencion di e beyesa natural aki ainda no ta suficientemente halto riba agenda. E sosten cu ta bini di Hulanda ta specialmente dirigi riba e islanan BES, pero na opinion di DCNA, naturalesa no conoce frontera. P’esey ta di vital importancia pa Reino duna tur seis isla sosten y en todo caso pa laga tur seis isla participa den e plannan pa proteccion di naturalesa y otro proyecto relaciona cu esaki.

DUTCH CARIBBEAN NATURE ALLIANCE

DCNA ta un NGO cu for di 2005 ta traha cu e organisacionnan dedica na maneho di naturalesa na tur seis isla di Caribe Hulandes, cu e meta pa protega biodiversidad y stimula maneho duradero di naturalesa. Door di traha hunto y comparti habilidad, conocemento y material, DCNA ta logra mantene un bon red di contacto y ta sostene maneho di naturalesa den henter Caribe Hulandes. DCNA ta yuda ofrece e parkenan e fuentenan duradero di financiamento tambe.

APERTURA DI E OFICINA NOBO

DCNA ta honra cu e echo cu Minister Schouten y Gezaghebber Rijna a efectua apertura di e edificio nobo dia 5 di september ultimo. No solamente tabatin un encuentro agradabel cu e colaboradonan y e team di maneho diario di DCNA, pero tambe cu director nobo di DCNA, señor Tadzio Bervoets.

YAMADA DI URGENCIA PA SOSTEN NA TUR ISLA

Señora Hellen van der Wal, presidente di directiva di DCNA a splica durante su discurso na ocasion di e apertura cu e colaboracion entre e seis islanan di Caribe Hulandes ta unico den Reino. P’esey mes e ta haya lamentabel cu Reino ta haci distincion entre Aruba, Corsou y Sint Maarten di un banda y e islanan BES di otro banda, ora ta duna atencion y brinda sosten na e islanan. Ademas tur ta enfrenta e mesun retonan, pa por mantene e naturalesa unico aki. Cambio di clima, capmento di palo, piscamento for di proporcion, sargassum, construccion y e impacto di turismo, pa menciona algun ehempel. Tur isla tin di haber cu e fenomenonan aki. Ta di sumo importancia pa traha hunto y siña di otro. Sigur ora ta trata di e problemanan, cu ta crusa frontera, ta straño si Reino, cu “Tur e islanan tin un naturalesa unico y

hustamente ta uni nos, haci distincion den su acercamento”. Minister Shouten a reacciona cu afirmacion y solidaridad: “Bo organisacion ta mustra incansablemente riba e tesoronan cu Caribe Hulandes tin. Bo ta alerta tambe pa e posibel menasanan. Paso cambio di clima, bida moderno y turismo ta cambia e circumstancianan pa e islanan su naturalesa di forma drastico.  

  • Portal Koninkrijksrelaties.nu offline pa sospecho di soborno

    Portal Koninkrijksrelaties.nu offline pa sospecho di soborno

    WILLEMSTAD – E portal Koninkrijksrelaties.nu ta bay offline pa motibo di sospecho di soborno. Esaki e portal di e radio Hulandes Dolfijn FM ta raporta diaranson. E hefe di redaccion di e portal, René Zwart, ta parce di ta den problema. E tabata envolvi tambe pa cu noticia di gobierno di Bonaire, esta Openbaar Lichaam Bonaire. E vespertino Amigoe tambe a cuestiona e integridad di e periodista. E miembro di Eilandsraad di Bonaire Clark Abraham ta bisa te hasta cu Zwart ta soborna, segun Dolfijn FM. Segun e portal di e emisora, Zwart ta bisa di no kier ta responsabel pa e daño cu esaki ta causa su doño di trabou. Pa loke ta Zwart mes, el a pone un editorial riba su portal, confirmando cu e ta pone un fin na e portal, debi na e situacion cu a surgi. E ta referi na e acusacion cu gobierno di Bonaire lo kier soborne pa publica e articulonan positivo. E lo mester a yuda gobierno di Bonaire cu trahamento di comunicado di prensa y otro relato, y a cambio lo a uza su portal pa bin cu informacion positivo di gobierno. E portal ta existi desde 2018 y tin mas of menos 65 mil lector diario. 

  • Corsou lo hunga contra Haiti toch pa honra memoria di nan fayecido keeper

    Corsou lo hunga contra Haiti toch pa honra memoria di nan fayecido keeper

    ORANJESTAD – E seleccion nacional di Corsou a dicidi cu nan lo hunga e wega contra Haiti diamars, na memoria di nan keeper, Jarzinho Pieter, cu a fayece repentinamente dialuna mainta na Haiti. Prome Minister di Corsou, Eugene Rhuggenaath, a confirma e informacion aki riba su pagina di Facebook dialuna merdia. E pregunta tabata si despues di e morto repentino, kico lo a pasa cu e wega di diamars mirando e situacion. Pues decision a cay den e seleccion, cu e miho forma pa honra memoria di e keeper ta, pa e wega sigui toch. E wega ta poni pa diamars atardi 6’or. 

  • Keeper di seleccion di futbol di Corsou a fayece na Haiti

    Keeper di seleccion di futbol di Corsou a fayece na Haiti

    PORT AU PRINCE - E keeper di reserva di e seleccion di Corsou, Jarzinho Pieter a fayece diripiente na Haiti dialuna. E seleccion ta na Haiti pa preparacion pa nan partido contra e pais anfitrion diamars. Diasabra caba e seleccion di Corsou a gana e seleccion di Haiti cu score di 1-0 den torneo di CONCACAF Nations League. Motibo di e morto repentino no ta conoci ainda. Keda pendiente pa mas informacion. Potret cortesia Jacinto de Jesus. 

  • Gobierno di St Maarten a perde mayoria dialuna mainta

    Gobierno di St Maarten a perde mayoria dialuna mainta

    PHILLIPSBURG – Gobierno di St Maarten a perde mayoria dialuna mainta, ora cu den forma di sorpresa, lider di partido UD, Franklin Meyers a retira su sosten na e gobierno di coalicion UD/SMCP. Asina e matutino The Daily Herald na St Maarten ta raporta. Meyers lo a haci e anuncio di sorpresa durante ciere di aña parlamentario dialuna mainta. E resultado ta cu e coalicion awor tin e minoria di 7 asiento di e total di 15 asiento, mientras cu oposicion (NA/US) tin 6 miembro y e miembro adicional cu ta deteni aworaki, Frans Richardson. Meyers ta cita manipulacion externo. Keda pendiente pa mas informacion. Cortesia The Daily Herald (SXM)

  • Bonaire ta conoce prome morto den trafico

    Bonaire ta conoce prome morto den trafico

    KRALENDIJK - Den oranan di atardi a drenta un notifikashon di aksidente ku herido grave riba Kaya IR Statius van Eps. Kaminda un auto a perde kontrol dal den palu di lus i boltu. Ambulans a transporta 2 viktima pa hospital pa trato mediko. Mas lat a drenta notifikashon ku e viktima J.N.J di 23 aña di edat a fayese a konsekuensia di e aksidente. Departamento di trafiko ta investiga e kaso. Forsa na e famianan den e momentu nan difisil aki ku perdida di nan ser keri.

  • Ex minister di Aruba ta maneha seguro medico general di islanan BES

    Ex minister di Aruba ta maneha seguro medico general di islanan BES

    KRALENDIJK – Despues di tabata minister di Finanza na Aruba den e gabinete anterior, Angel Bermudez ta den un funcion diferente awor, y a establece su mes na Bonaire como hefe di Zorg Verzekerings Kantoor (ZVK) cu ta manera e AZV di Aruba. Bermudez no ta un desconoci na Bonaire ya cu prome cu el a bira minister bek den e ultimo gabinete Mike Eman 2, e tabatin un funcion halto na belastingkantoor caba na Bonaire. Su funcion actualmente ta pone cu e ta maneha e seguro medico di tres isla, esta Bonaire, Saba y St Eustatius, conoci como islanan BES. 

  • Powered by SETAR