Gobierno: No tin ningun decision tuma ainda tocante sugar tax

ORANJESTAD – Gobierno (lesa: Minister di Finanza y Economia Xiomara Maduro) a sigura prensa, cu no a tuma ningun decision ainda riba sugar tax. Asina nan ta bisa den un comunicado manda pa media e siman aki. Segun gobierno, ta durante dos dia di reunion riba reforma fiscal, a informa e gremionan y cu segun gobierno, e gremionan a bay di acuerdo. De hecho, a manda e comunicado den nomber di gremio y gobierno. Di otro banda, durante e mesun reunion, Camara di Comercio (KvK) a mustra nan desaprobacion pa e forma con e reunion a bay, pues no ta contento.

PROPOSICION

Segun gobierno, tanto di parti di Gobierno como di parti di e gremionan, a trece e proposicionnan. Por ehempel Gobierno a papia di un aumento di accijns riba refresco, e gremionan a pidi aumento di accijns riba sucu y ketchup tambe. Segun e comunicado, a duna espacio pa tur hende trece nan puntonan padilanti y na final a keda palabra, cu lo bolbe hunto pa sigui delibera. Camara di Comercio mientrastanto a bisa cu nan no a haya suficiente tempo. 

SATISFECHO?

E comunicado ta sigui bisa cu e gremionan presente a keda satifecho y agradecido pa e invitacion, di por a participa pa prome biaha na un sesion asina importante. NoticiaCla.com no por a verifica cuanto gremio ta para tras di e declaracion aki y cu si enberdad tur gremio ta sostene esaki. Gobierno a sigui bisa cu nan ta lamenta cu e oponentenan kier crea panico y caos, simplemente pa miedo pa e cosnan cana manera mester ta den nos pais. “Pasobra nan nunca a organisa un encuentro asina, nan no kier pa e encuentro ta exitoso” e comunicado ta finalisa bisando.