Aruba representa den reunion di CaribNet na Puerto Rico

ORANJESTAD - Recientemente a tuma luga e reunion general anual di e organisacion CaribNet na Puerto Rico unda cu Aruba tambe tabata representa. CaribNet ta un organisacion di Arte di Caribe, funda na Aruba na 1997 bou auspicio di e Aruba International Dance Festival cu a tuma luga e aña ey, bou direccion di sra. Wilma Kuiperi-Jansen. Representantenan di arte for di diestres(13) pais di Caribe Ingles, Frances, Spaño y Hulandes a bin hunto pa forma ‘CaribNet’ hunto cu sosten di e organisacion ‘La Red’ (Red de Promotores Culturales de Latinoamérica y el Caribe).

CaribNet ta trese presentadornan di artistanan di Caribe hunto pa por disemina y comparti e produccion artistico di nos region cu mundo y yuda e desaroyo di careranan artistico. E enfoke ta riba produccion artistico den ramo di artenan escenico (baile, teatro, musica) y tambe di arte visual y literatura.

E aña aki pues, e reunion anual a tuma luga na Universidad de Puerto Rico na Rio Piedras. Durante e reunion aki, a trata varios topico cultural/artistico relevante pa e paisnan Caribense, y tambe a tene eleccion di un directiva nobo. Tabatin excursionnan pa museonan, presentacionnan di e paisnan miembro, workshop y lecturanan, y lanzamento di un website nobo. Keynote speaker Dr. Mareia Quintero Rivera a duna e discurso “Cultural Agency and Sustainability in Precarious Times and Situations”. Tambe tabatin presentacionnan virtual di varios miembro internacional.

E Presidente saliente di CaribNet, sr. Rawle Gibbons di Universidad di West Indies na Trinidad, algun aña pasa tabata huesped di Instituto Pedagogico Arubano na su apertura di aña academico. Ela ser remplasa pa e Presidente nobo, sra. Michelle Cox, experto den teatro di Barbados.

Sra. Wilma Kuiperi-Jansen, a participa na e reunion como miembro co-fundador di CaribNet y ademas tabata invita pa duna un lectura. Su presentacion virtual ta relaciona cu creacion di publico pa arte pa medio di enseñansa di competencianan creativo y di calidad den producion di arte. Como ehempel ela usa su experiencia extenso como artista internacional y maestra di Educacion di Baile, y tambe su proyectonan pionero pa desaroya calidad, conosemento y innovacion den arte multidisiplinario den añanan ’80 y ‘90.

Wilma Kuiperi-Jansen den pasado a presenta lecturanan na organisacionnan internacional na e.o. Kingston, Jamaica (DaCi World Congress 2011), na Paris, Francia (UNESCO y World Alliance for Arts Education 2012), y na Munchen, Alemania (Polylogue II World Congress 2013).

Den e encuentro aki di CaribNet na Puerto Rico e miembronan a vota pa e Encuentro Caribnet 2015 tuma lugar na Aruba. Tocante miembrecia por tuma contacto via artland_aruba@yahoo.com cu e titulo ‘CaribNet’.