ELMAR: Hopi area afecta den fin di siman pa dalmento di auto riba palo di lus

ORANJESTAD - Den fin di siman departamento tecnico di Elmar a wordo confronta cu un total di shete dalmento di auto riba palonan di lus. E accidentenan aki a causa interupcion den diferente bario. Tecniconan consciente di e inconveniencia cu interupcion imprevisto di coriente ta causa den oranan di anochi of marduga, a percura pa suministra coriente mas pronto posibel na e areanan afecta door di e accidentenan aki. 

Diasabra 31 di augustus pa mas o menos 2:00 am a drenta e prome melding di un accidente contra un palo di lus na Noord den area di Imeldahof.

Pa mas o menos 4:30 am a drenta un otro melding cu un auto a accidenta den area di Pavia contra un palo di lus. 

Un rato despues, pa mas o menos 4:45 am a drenta un melding cu den area di Kamerlingh Onnestraat varios cas no tin coriente. A resulta cu ta un otro accidente entre un auto y un palo di lus.

Ta sigui un melding pa mas o menos 5:00 am den Caya Dick Cooper area Watertoren na San Nicolas, un otro auto a accidenta contra un palo di lus. 

Diasabra a bira un warda largo pa departamento tecnico di Elmar. Algun ora despues pa mas o menos 11:15 am un auto a accidenta contra un palo di lus den area di House of Cheng. 

Pa mas o menos 11:55 am den area di Meiveld un auto a accidenta contra un otro palo di lus.