DOW a inicia investigacion disciplinario riba e trahado deteni pa abuso sexual

ORANJESTAD - Departamento di Recurso Humano di DOW a cuminsa un investigacion riba e empleado, cu diaranson mainta a keda deteni, riba sospecho di abuso sexual cu varios menor di edad. Diahuebs DOW a informa publicamente cu nan a cuminsa un investigacion riba e trahado en cuestion, pero no a haci mencion di su nomber, sino djis a referi na ‘un empleado publico’.

DETENCION

DOW mas despues ta referi si na e detencion y e cargonan. “Ayera 4 di september 2019 un empleado publico a ser aresta door di autoridad, pa motibo cu e ta sospecha di a comete actonan inmoral” e informacion ta bisa. “DOW a cuminsa cu un investigacion disciplinario inmediatamente den margen di LMA riba e sucedido y ta sali di punta di bista cu tur nos empleadonan ta cumpli semper cu nos regla-, norma- y balornan stipula den nos reglamento interno. Segun e investigacion di Ministerio Publico ta desaroya, nos como organisacion tambe lo sigui tuma e pasonan necesario contra e persona aki, pa salvaguardia e integridad di nos organisacion y bienestar di tur colega,” e informacion a finalisa bisando.

KICO A PASA

Tabata diaranson mainta cu polis a detene e homber Jaime T. na pia di trabou na DOW, sospecha di abuso sexual di un grupo di mucha, variando di edad di 8 pa 11 aña. Pa varios dia caba polis tabata trahando cu e muchanan aki y compilando informacion pa tin suficiente informacion, pa por a convence Ministerio Publico pa detene e persona aki. E persona ta uno hopi conoci y como tal e informacion a bin como un shock pa hopi hende. Mas tempran den dia, NoticiaCla.com a acerca Ministerio Publico pa haya confirmacion, pero nan no tabatin informacion. Ta mas laat, e portal aki a haya confirmacion, pa por a bin cu e informacion aki.