Corte Hulandes a evita husticia di clase pa famia comersiante di Corsou

WILLEMSTAD - Ayera e tres hueznan di Corte di Prome Instancia na Hulanda, pa ta exacto, Corte di Overijssel, a indica cu no ta bay aplica husticia di clase pa e dos ruman hombernan comerciante di Corsou; Itzhak y Omer Grynzstein. No ta bay duna nan castigo hopi abou cu Ministerio Publico a pidi pa nan. Corte a aumenta e castigo p’e acusadonan. E rumannan Grynzstein a keda haya culpabel di labamento di miyones di placa, 320 miyon dollar pa medio di swipe dollar door di e turistanan, falsificacion y estafa. E caso tin e nomber di Cymbal.

Corte ta haya proba cu nan a laba placa, pa medio di e transaccionnan di e tarhetanan di credito. Pa comete e hecho di labamento di placa, el a comete falsificacion y estafa. Door di e acto dje acusadonan, nan a coopera pa e placa di crimen keda leu for di bista di husticia. Labamento di placa di criminal ta forma un menasa pa economia legal di un pais y tambe ta mishi cu integridad dje trafico economico y financiero di un pais. E acusadonan a actua solamente cu fin pa gana placa, sin a tene cuenta cu consecuencia riba comunidad di nan acto.

P’esey e castigo cu Ministerio Publico a pidi pa e acusadonan no ta cubri e hechonan castigabel. Cu meta di e prevencion general den e caso aki ta dificil pa mantene e acuerdo.

Tambe corte a tene na cuenta cu e sentencia aki sigur lo keda publica den e medionan tanto na Corsou como Hulanda. Un publico grandi lo tuma nota dje sentencia den ambos pais.

Mester evita cu ora tin tipo di e delitonan organisa di placa, cu ta crea un imagen di husticia di clase. E acusadonan no tabata biba un bida di pobresa.

Si impone un castigo hopi abou pa e acusadonan p’e acuscionnan di labamento di miyones di placa, falsificacion y estafa, e ora ey no ta logra e meta di e castigo cu ta prevencion general.

Na opinion di Corte, hustificacion di gravedad dje hechonan, e escala grandi cu e hechonan a keda comete, e periodo largo cu cada biaha e acusado a haci su mes culpanel na e hechonan, e caracter profesional y organisa dje hechonan, como punto di salida un castigo di 7 aña ta na su luga pa Itzhak.

Corte a tene cuenta cu e otro casonan similar ora ta trata e castigo, pero den e castigonan ey e cantidad di placa ta hopi abou.

Corte a indica mas aleu cu ora Ministerio Publico a haci su demanda, casi no a tene cuenta cu e puntonan di orientacion LOVS pa fraude, cu ta menciona cu ora ta trata di miyones cu e castigo minimo ta di 2 aña. Esaki ta castigo pa un miyon, pero e hecho cu na varios ocasion a keda comete, e castigo mester ta mas halto y ta yega e castigo maximo. Den e lusa aki, corte ta haya e demanda di Ministerio Publico pa e rumannan Grynsztein no ta cuadra.

Pa loke ta trata Itzhak a indica cu un castigo di prison lo tin consecuencia p’e y su famia, cu ta biba na Merca y pa su permit di estadia na Merca (green card). Corte ta compronde esaki y cu e acusado mester ta na Merca pa su casa y yiunan. Sinembargo e acusado mester a pensa esaki, ora e tabata comete un hecho castigabel, segun corte na Hulanda. A pesar cu e acusadonan a duna claridad na e hechonan, pero toch e acusadonan no a mustra suficiente bista den e caso. E hecho cu e acusadonan a yega na ciero palabracion cu husticia, pa atende cu e caso aki y tambe a yega na un palabracion cu kantoor di Belasting y MCB Bank, ta conta na fabor dje acusadonan.

Teniendo cuenta cu tur cos, corte ta yega na 6 aña di prison pa Itzhak. Tambe ta prohibi e acusado di haci e servicionan financiero pa 5 aña. Pa loke ta trata e ruman homber a haya 5 aña di prison. Pa Omer, Ministerio Publico a demanda 36 luna di prison di cual 24 luna ta condicional. Naturalmente e acusadonan tin oportunidad pa apela e sentencia.