AZV ta sigui busca partnernan regional pa ofrece miho cuido

ORANJESTAD - AZV ta sigui busca partnernan regional pa ofrece miho cuido na Aruba. Esaki ta un di e puntonan principal cu e titular di salud, Alex Schwengle a discuti durante e simposio organisa pa AZV, unda cu e topico ta colaboracion regional . A invita representantenan di nos islanan ruman como tambe Colombia y Merca pa participa. M Schwengle a splica cu e meta ta pa logra un situacion “win-win” unda cu pa medio di colaboracion regional ta logra baha gastonan di cuido na Aruba.

E mandatario a expresa cu sigur pa Aruba esaki ta hopi importante, pasobra nos ta un isla chikito y un isla chikito ta mas vulnerabel y bo recursonan ta mas limita. Pa medio di busca partnernan den nos region ta purba yega na colaboracion cu e partnernan aki pa wak si por logra baha gasto y mehora e cuido, el a añadi. “Claro, hopi biaha bo kier haci cosnan bo mes, pasobra bo tin gana pa bo ciudadanonan haya tur sorto di cuido cu nan mester na bo mes pais , pero no tur ora ta cumbini bo haci tur e cosnan bo mes. Tin biaha ta cumbini bo haci cosnan en colaboracion cu paisnan mas grandi paso ta cosnan hopi caro,” Schwengle a expresa.

E mandatario a bisa cu por ehempel ta evaluando e misionnan di “open heart surgery” cu a tuma luga caba pa wak si di berdad esaki ta un partnership cu ta financieramente factibel pa Aruba. Loke a wordo estableci - p’esey tambe a sigui y recientemente a completa e di mision, ta cu e calidad di e cuido ta bon y pues no tin problema pa haci e operacionnan aki na Aruba. Unda tin duda ta pa cu e factibilidad, pues e gastonan envolvi y p’esey mes ta haciendo un analisis detaya di e gastonan.

Un otro ehempel cu Schwengle a menciona ta e test specialisa pa pashentnan di cancer, esta e PET-CT. Actualmente tur pashent cu mester haci un PET-scan ta wordo manda Colombia. Aruba ta probecha cu pa medio di colaboracion regional nos pashentnan por wordo ofreci e test specialisa aki, pero nos isla mes ta demasiado chikito pa por adkiri e scanner, cu ta un mashin hopi caro y e grandura di nos populacion no por hustifica e inversion aki. Control di gastonan en general ta un prioridad, segun Schwengle. El a splica cu prome cu AZV, pues desde 2001 a bin ta reduci gastonan. Prome cu 2001, Aruba tabatin un porcentahe di mas di 7% pa aña na “beheringskosten” den cuido y den e ultimo cuater añanan esaki ta varia entre 3 pa 4%. Esaki ta comparabel cu paisnan cu ta duna ofrece cuido comparabel na esun di Aruba, incluyendo Hulanda y Corsou, e mandatario a bisa.

Schwengle a subraya cu naturalmente Aruba kier mantene cu gastonan mas abao posibel, pero inversionnan mester sigui y tambe gastonan internacionalmente tambe ta sigui subi. Ta logico cu e gastonan no por ta 0%, pero si por sigui domina e “beheringskosten” entre 3 pa 4% e ta un di situacion hopi aceptabel mes, el a conclui bisando.