KvK a pidi gobierno mas tempo pa reacciona riba reforma fiscal

ORANJESTAD – Awe diaranson 4 di september, Camara di Comercio y Industria Aruba (KvK) hunto cu otro gremion comercial a reuni cu gobierno pa elabora riba e topico di e reforma fiscal cu gobierno a presenta. KvK a haya 10 minuut pa trece su punto dilanti y mañan lo tin otro reunion, den cua lo tin mas tempo pa elabora riba diferente punto. KvK a pidi pa mas tempo pa por studia esaki, pasobra e ta dificil pa duna contesta, sin sa kico ta e situacion den su totalidad. 

KvK a splica cu nan kier haya un rol mas prominente den e proceso di tuma decision en bes di constantemente ta invita, despues cu e decisionnan ta tuma caba y sin consulta su opinion y contribucion den e materia. KvK no ta di acuerdo cu gobierno ta ofrece nan solamente 10 minuut pa duna un contesta na algo asina impactante y importante pa nos economia. E ta crucial pa delibera e asunto adecuadamente y cu gobierno otorga sector priva e periodo minimo di 1 siman di tempo, pa por haci un sondeo apropia y di e forma aki, contribui debidamente na e reforma fiscal.

Mester considera sector priva como un partner strategico pa yega na un solucion. Esaki a base di e conocemento y experiencia, cu ta duna un aporte practico pa formalisa e plan y su solucion. E solucion mester ta transparente pa e consumidor. No ta importa kico bira e solucion, ta e consumidor ta esun cu lo tin cu paga pa e producto of servicio. E gastonan di pueblo ta keda subi, pero gobierno di su banda tambe mester tene na cuenta cu su gastonan tin cu baha tambe y no solamente hisa impuesto. 

Pa KvK ta importante cu e BBO ta keda visibel riba e recibo y cu no ta sconde esaki pa e consumidor. P’esey KvK a entrega un propuesta di cambio di ley caminda cu articulo 9.b di e LV BBO en PPS Projecten (AB 2006 no. 83) y e articulo 11a di e LV AZV (AB 2014 no. 59) lo elimina y lo introduci e punto lid (h) den articulo 9.a.1. E punto aki ta stipula cu e porcentahe y e suma cu mester traspasa na impuesto. Otro sugerencia ta e introduccion di un articulo nobo, cu lo reemplasa e articulo 3 existente. Esaki ta trece transparencia den e forma con mester calcula e impuesto aki y cu e impuesto ta conta riba e producto- y servicionan. 

Gobierno a presenta un accijns nobo yama “Sugar Tax” como un posibel manera pa genera mas entrada. Un organisacion serio manera; KvK, lo duna un conseho na gobierno despues di ricibi e reforma fiscal den su totalidad, pa por studia e impacto total riba e economia y nos comunidad.