Aruba Bank prome compania na mundo pa introduci Report App

ORANJESTAD - Pa Aruba Bank ta importante pa tur hende sinti nan mes safe na trabao. P’esey a scoge pa introduci e Report App. E plataforma aki ta sostene nos pilarnan strategico We Care y We Build y alabes ta crea conscientisacion di un comportacion inapropia den nos espacio di trabao.

E obhetivo di e Report App ta, pa yuda mantene un esfera agradabel na trabao, door di conscientisa y stimula bon comportacion entre e empleadonan. E App lo yuda conscientisa y identifica e diferente tipo di comportacionnan inapropia, encurasha esunnan deseabel y resolve e casonan encontra.

Segun Sharon Frankel-de Cuba, Managing Director di Aruba Bank, e idea ta pa elimina barera cu ta impedi e empleado di sinti su mes comfortabel, door di provee e “tool”, pa e por raporta un incidente.

E App ta duna e empleado e oportunidad pa raporta na un manera facil, rapido y na cualkier momento di dia.

E videonan informativo lo guia e empleado pa ricibi informacion tocante e diferente formanan di comportacion inapropia na pia di trabao, cu ta inclui pero no ta limita na entre otro: agresion, violencia, discriminacion, bullying of termento y acoso sexual (sexual harassment) sea fisico, sexual of mental.

Nos ta contento di por crea un luga di trabao sano, caminda cu tur empleado ta sinti nan mes sigur door di facilita cu na momento cu detecta comportacion INAPROPIA nan por RAPORTA. Pa mas informacion por bishita www.report-app.com.