Tweede Kamer ta sostene Knops si e kier interveni na Aruba

DEN HAAG – Tweede Kamer na Hulanda (Parlamento Hulandes) su preocupacion pa e finanzas di Aruba ta aumentando. Asina Caribisch Netwerk, partner di NoticiaCla.com ta raporta. Partido di coalicion VVD kier pa secretario di estado Hulandes Knops interveni. “Si, esey ta berdad!” Andre Bosman a confirma pa NoticiaCla.com diaranson merdia ora di Aruba. “Tweede Kamer ta sostene gobierno (Hulandes) den esaki sigur,” Bosman a sigui bisa. 

Parlamento di Aruba mes kier tin control riba finanzas publico y ta purbando pa kita e supervision cu Rijksministerraad tin riba finanzas. Knops (CDA) a bisa caba, cu e hecho cu Parlamento di Aruba a kita e supervision independiente door di acepta un mocion, inaceptabel. “Eynan mester bay drecha algo,” Knops a bisa. 

SOSTEN PA INTERVENI

Cerca partido di gobierno VVD, e pasenshi a caba. “Si secretario di estado kier interveni, e tin mi sosten. Ta un tarea basico pa drecha bo finanzas,” Bosman a sigui bisa. No ta solamente cerca VVD. E sorpresa y lamento ta cerca partido di oposicion Groenlinks tambe. “Ta parce comosifuera tin un tipo di rechaso di tur palabracion haci,” Nevin Özütok ta bisa. Groenlinks ta bisa cu ta comprendibel cu Knops kier interveni si Aruba ‘cera e porta’ (pa supervision financiero independiente). “No ta importa mi kico sosode,” miembro di partido SP Ronald van Raak a bisa. “Contal cu tin supervision riba finanzas di gobierno. E mester ta independiente, di experto y e mester funciona”. 

PREOCUPACION ANTERIOR

Tabatin preocupacion grandi caba den Tweede Kamer, pasobra e debe di estado durante e gabinete anterior (Eman) a aumenta di 2 pa 4 biyon florin Arubano (2 biyon Euro). “Aruba mes no por sali di esaki,” van Raak a bisa. “E problema ta cu nan ta failliet. E unico forma ta, si e otro paisnan kier inverti na Aruba. Y esey por solamente si e maneho drecha”.   Aruba tin algun tempo ainda pa convence Knops, cu lo keda un tipo di supervision financiero independiente. Posiblemente RMR por interveni ainda despues si mester. 

Partido MEP segun CN ta spera cu Gabinete Hulandes ta dispuesto pa duna Aruba un prestamo ‘suave’. “E ora por tin un solucion pa tur hende,” Ady Thijsen, presidente di Parlamento di Aruba a bisa. Segun partido VVD, por papia solamente di e ‘zachte lening’, si e isla cumpli cu tur exigencia y condicion cu nan mes a pone. “A bira tempo pa nan cumpli cu tur e acuerdonan cu nan a cera tur e añanan atras cu Hulanda y bay ehecuta nan”. 

For di Caribisch Netwerk