Parlamentario y Premier ta discuti riba Facebook riba presupuesto

ORANJESTAD – E preocupacion di un parlamentario Hulandes pa cu e situacion di finanzas na Aruba, a bira un discussion ‘publico’ entre e parlamentario y prome minister Evelyn Wever ora cu Wever a dicidi di contesta Bosman riba su pagina di Facebook. Bosman a cuestiona e hecho cu Aruba no a logra entrega e presupuesto di pais Aruba na tempo. No ta prome biaha cu Wever ta haci esaki esta contesta Bosman riba Facebook. Loke ta interesante ta cu normalmente discusionan asina ta sosode tras di porta cera. Pero segun Bosman, ta bon pa cierto discusionan asina bay publico pa tin e ‘transparencia’ necesario. 

BOSMAN

Segun Bosman, e tin ‘hopi’ problema, cu e hecho cu Aruba un biaha mas no ta logra entrega su presupuesto na tempo. Pa ley, esaki mester sosode pa 1 di september di e aña anterior, mas tarda. Pero gobierno a anuncia caba cu esaki no a logra. “Hulanda mester sostene Aruba y mester tin compresion, asina mi ta compronde di bo storia,” Bosman ta cuminsa bisa. “Ki dia Aruba y su gobierno ta cuminsa ehecuta loke nan a priminti den tur convenant y protocol di e ultimo añanan? E facilidad cu cual e gobernantenan di Aruba no ta tene nan mes na palabracion (y no ta importa si ta AVP of MEP) ta hopi fastioso. Y p’esey nunca mi lo sostene un prestamo ‘suave’ na Aruba, tanten e gobernantenan cuminsa cumpli cu nan promesanan”. E prestamo ‘suave’ ta loke cu Aruba a haya como promesa di Hulanda na 2015, unabes cu Aruba su presupuesto ta balansa. Algo cu ainda no a logra. Aunke cu e situacion a drecha basta, ainda Hulanda no ta dispuesto pa cumpli cu e promesa ey. 

REACCION WEVER

Wever a opta pa mesora reacciona riba e post, indicando cu e no ta compronde e pregunta di Bosman y cu posiblemente e periodista cu a raporta e storia, no a compronde e mensahe y/of a bisa algo diferente. Ora cu Bosman a splica cu su pregunta ta basa riba un declaracion cu Wever lo a haci, Wever a laga sa mesora cu nunca e no a bisa esey, y cu ‘no mester kere semper loke cu e ta lesa’ y a pidi Bosman pa scucha su conferencia di prensa trankil. Wever mesora a probecha di e oportunidad pa splica e situacion cu segun e, e gobierno actual a haya Aruba aden y tur e cosnan cu e gobierno aki a haci etc etc. Sinembargo e splicacion di Wever no a convence Bosman cu a contesta simplemente ‘Mi postura no ta cambia’. Ademas a sigui bisa tambe, cu e ta cansa cu un gobierno ta culpa esun prome.

BAY BIN

A sigui un bay bin entre nan dos, riba ken a haci kico, ki paso a tuma pa remedia e situacion. Mientras cu Wever tabata ilustra e puntonan positivo haci pa e gobierno y a sigui pa ilustra e puntonan positivo di tanto CAFt como otro instancia, Bosman no a perde pa gana y a contesta cu ta bon cu tin e puntonan positivo, pero cu mester ilustra e puntonan negativo caba y e nombra nan tur un pa un. Ora cu Wever a purba bolter e asunto, pa mustra cu mientras cu Hulanda ta critica, cu si cu kico Hulanda a sostene Aruba. Cu esaki Wever porta tabata kiermen e hecho cu contrario na Corsou, Hulanda no a yuda financia Aruba cu su debe, pa e por tin un ‘control’ riba Aruba. Bosman mesora a contesta cu si, Hulanda a sostene Aruba cu husticia manera polis, IND etc. Despues otro politico tambe a cay aden, manera di MEP, Endy Croes, cu no ta sconde su disgusto contra e politiconan Hulandes. Henter e discusion ta visibel riba pagina di Facebook di Andre Bosman AKI.